أنواع الصحاب اللي في حياتنا كتير، الصاحب اللي معاك في مصايبك قبل منك، صاحبك اللي بيداري عليك، صاحبك اللي قابل الوحش قبل الحلو اللي فيك، شريك الخناقات والنط من على السور والتزويغ من الدروس، واللي يسهر معاك بالساعات لو متضايق، والصاحب اللي الواقع يبقى سخيف من غيره، كلهم أنواع من الصحاب شوفناها وقابلناها في حياتنا، والسينما دور من أدوارها الأساسية إنها تعبر عن حياتنا وعلاقتنا الإنسانية، ومن أهم العلاقات اللي لازم تفتح لها مجال في الكلام والرغي هي علاقة الصداقة، وخصوصًا لما بنلاقي نماذج إيجابية بتتكلم عنها السينما. وفي القائمة دي حبينا نجمع لكم علاقات صداقة في السينما شوفناها واتعلقنا بيها.
يسرية وضحى وسلمى – أحلى الأوقات
بيتكلم عن تلات بنات صحاب ماشافوش بعض من أيام المدرسة، ولما رجعوا بعد سنين كتير واتقابلوا، كإنهم لسه سايبين بعض امبارح! نفس الترابط والقوة في العلاقة ماتغيرش، وكانوا في الفيلم ده من نوع الأصحاب اللي ممكن يدخلوا نفسهم في 100 مصيبة وكارثة لو بس صاحبهم كان محتاجهم، دخلوا شقق ناس مايعرفوهاش وعملوا خطط علشان بس يجيبوا لصاحبتهم معلومة عن شخص، وعملوا محققين ودخلوا القسم علشان بس يعرفوا مين اللي كان بيبعت لصاحبتهم الجوابات.
كريم وطارق وعبد الفتاح – أصحاب ولا بيزنس
تلات أصحاب درسوا واتخرجوا واشتغلوا ونجحوا مع بعض، الفيلم كان بيناقش فكرة علاقة الصداقة قصاد المصلحة والفلوس والشغل، وممكن تعمل إيه لو اتحطيت في موقف خيروك فيه بين إنك تخسر صاحب عمرك أو تتمسك بوظيفتك؟ وكمان هنلاقي إن أغنية الفيلم من العلامات المميزة اللي فيه.
بركات ومرزوق – سلام ياصاحبي
فيلم من علامات السينما المصرية، جسد شخصية الصاحب اللي يقدر يضحي بحياته علشانك عادي، والصاحب اللي يجيب حقك مهما كان التمن، الأصحاب اللي فضلوا على العهد اللي بينهم حتى لو كان التاني ده مابقاش موجود.
جاد وأسامة – صاحب صاحبه
في فيلم صاحب صاحبه قدر جاد وأسامة إنهم يعملوا دويتو ناجح ومحبوب، جاد اللي قرر إنه يتخلى عن حلم سفره علشان صاحبه يسافر مكانه ويكون مستقبله وفي نفس الوقت علشان ياخد باله من أهله لحد ما ييجي، ناس كتير ماتقدرش تضحي التضحية دي ولا حتى الناس القريبين.
سيد وعاطف – فيلم هندي
في فيلم هندي بطولة أحمد أدم وصلاح عبدالله، اتكلم عن الصاحب اللي يقدر يضحي بعلاقته بخطيبته مقابل إنه مايخسرش صاحبه، وفي مشهد من أشهر مشاهد الفيلم لما عاطف “صلاح عبدالله” سأل سيد “أحمد أدم” وقال تفتكر لسه في حد يقدر إنه يضحي بشقته وخطيبته علشان صاحبه؟ رد وقال: وتفتكر أنت العمر في كام 30 سنة تاني علشان أعمل صاحب غيرك!
ياسمين وجومانا – بنات وسط البلد
علاقتهم تشبه علاقات أصحاب كتير نعرفها، اللي بيشاركوك مصايبك، اللي بيتخانقوا مليون مرة في اليوم ويضربوا بعض بالجزم ويحلفوا إنهم مايكلموش بعض تاني، بس بيرجعوا تاني يوم عادي جدًا وبضحكة قادرة إنها تهدم أي خلاف بينهم.