بوست على الفيس بوك شوفت فيه واحدة بتحكي إن الـ”اتش آر” بتاعها لقاها مكتئبة فرفدها لمدة يوم واحد تفرفش فيه وتستجم على حساب الشركة، وماحدش يتصل بيها من الشغل، علشان ترجع تاني نفسيتها أحسن على الشغل. وبعدها قعدت ادعبس في بوستات تانية متعلقة بالموضوع لقيت إن في مواقف حصلت مع ناس شبه الموقف ده؛ زيّ إنهم يدوا للموظفين نص ساعة وقت الشغل علشان يلعبوا ألعاب، وشوفت شركة حاطة يافطة على البصمة اللي بتعدي عليها كل يوم الصبح علشان تسجل حضورك مكتوب فيها “ولا يهمك التأخير مش محسوب المهم إنك وصلت بيتك التاني” وواحد تاني كان مقدم استقالته للشركة وبعدها اتفاجيء إن الاتش آر رفض الاستقالة وقال “بنصبح عليك في الأول وأنت واجهة وفخر للشركة وعدم وجودك هيفرق معانا، وعلشان مزاجك يبقى رايق قررنا نزود لك مرتبك بنسبة 30% وهنصرف لك نوع الشوكولاتة اللي بتحبها.”
المهم وأنا قاعدة بجمع القصص دي صعبت عليا نفسي، وأي حد ممكن يكون بيعاني مع الاتش آر في شركته أكيد فاهم ازاي ممكن القصص والكلام اللي زيّ ده يقع عليه وقع الصاعقة، ويخش في أداء ده “احنا مش عايشين يا جدع” ومش بعيد حد وهو يقرا المقال ده يبقى لسه مخصوم له يوم علشان نسي يمسي على الشركة وهو ماشي ويمضي انصراف مع إنه أصلًا بيكون رايح علشان يكمل شغل في البيت، بس لأ ازاي.
وبدأنا نفكر هل فعلًا في الاتش آر الطيب وفي الشرير؟ هل في أشخاص ممكن تستغل وظيفتها إنها تكدر موظفينها وتصبح عليهم بخصم وتمسي عليهم بخصم بدون أي اعتبارات إنسانية ويبقى ماشي يمسك لك على الغلطة؟ وكله كوم ولما يطلبنا في المكتب عنده ولا كإننا مترحلين على النيابة، ولا الموضوع كله بيبقى من صميم شغلهم وفي إطار وظيفتهم؟ وعلشان مانبقاش بنقول كلام في الهوا اتكلمنا مع اتش آر وفهمنا هو بيعمل إيه بالظبط ولو الدلع اللي بياخده بعض الموظفين أو التكدير اللي بياخده برضه من صميم شغله، اتكلمنا معاه علشان نقول اللي لينا واللي علينا.
هو الاتش آر بيعمل إيه؟
من كلامنا مع الاتش آر حسام هلال، فهمنا إن دي وظيفة مستحدثة والموضوع كان متحدد زمان إن وظيفته تبقى لها علاقة بالحضور وملفات محطوطة في الأرشيف للموظف وشكرًا على كده وكان وقتها القسم اسمه “شئون العاملين” بس دلوقتي الموضوع بقى أشمل وأسع وبقى اسمه موظف موارد بشرية وبقى مسؤول عن التعيين والحضور والتأمينات وجزء التطوير إنه يطور من الموظفيين بتوعه ومسئول عن الترقيات والحاجات القانونية، وعارف كل حاجة بقانون العمل وتطبيق اللوائح الداخلية وفقًا للي موجودة في البلد.
وسألته على القصص اللي جمعناها على السوشيال ميديا واللي بتورينا شركات عايشة في عالم موازية وهل دي من مهام أخصائي الموارد البشرية ولا الناس دي بتحب تعمل شوو؟
رد وقال ” إن كل موظف موارد بشرية عنده مساحة بيتحرك فيها فلو المكان مدي له المساحة إنه ياخد قرارات فورية زيّ إني أكافيء حد هيعمل كده، بس في أماكن بتبقى مضيقة الموضوع ولازم يعدي على كذا حاجة علشان ياخد الموافقة “، وكمل كلامه “إن لو الموظف غير قادر على أداء وظيفته في يوم معين لازم يمشي في أي لحظة لإنه أساسًا لو كمل مش هيفيد الشغل وهيأثر على باقي الناس اللي حوليه ولو أنت قعدت تضغط عليه وهو بيقولك أنا مش قادر وأنت قعدته بالعافية، ممكن تخسره للأبد ومع أول فرصة هتييجي له برا هيمشي.. في فرق بين القوانين اللي بيمشي عليها الكل وفي فرق بين الاستثنائات الإنسانية.”
وأخر حاجة قالها “إن جزء من شغلي إن الناس تبقى مبسوطة زيّ إنك تعمل لهم أنشطة، وإن الاتش آر ممكن يبقى سلبي لو شاف حاجة بتحصل قدامه ممكن تأثر على باقي الناس وماخدش فيها قرار.”