على مدار كل الأعياد وكل السنين، في شخصيات معروفين وبتشوفهم كل عيد لحد ما بقوا ماركة مسجلة، لإنهم بيبقوا دايمًا حواليك عرفتهم وحفظتهم.. تعالى نقولك عليهم وتقولنا أنت مين فيهم؟
الجدة اللي بتكرمش لك الفلوس – المموهة
الجدة اللي بتكرمش لك فلوس في إيدك كإنها بتديك مخدرات وتقولك “بس لأحسن حد يشوفها” ومش بتبقى مبينة مديالك كام، وتطلع في الأخر خمسة جنيه أو عملة تكون انتهت أصلًا من أيام الملك فاروق ..بتعمل جو تمويه من الآخر.
اللي مش بيرجعوا غير في العيد – العمة المهاجرة
مش بتيجي غير في الأعياد والإجازات الرسمية، بتشوفها مرة كل فين وفين، ولازم لما تيجي تستقبلها في المطار، وهي نفس العمة اللي بتسألك أسئلة غريبة أول ما تشوفك، زيّ إنتي بقيتي في سنة كام دلوقتي يا حبيبتي؟ أنتي لسه لمضة زي ما أنتي؟ … بس للحق لما بتيجي بتجيب معاها هدايا حلوة.
اللي بيفضل قاعد على كنبته طول العيد – البيتوتي
كل حاجة بتبقى على كنبته، وبيفضل قاعد عليها من أول يوم في العيد لآخر يوم، مع الشاي والبسكوت والمسرحيات والترمس والفول السوداني، رافض يختلط بالمجتمع الخارجي اللي برا ويشوف لبس وحاجات تجيب عمى ألوان.
اللي بيرمي بومب وصواريخ – المشاكس
بيحدف عليك بومب وصواريخ من كل حتة؛ وأنت ماشي في الشارع، وأنت قاعد في البلكونة، وساعات بتبقى قاعد سرحان تلاقي مرة واحدة صاروخ جيه في هدومك، وبتحس ساعتها إنك عايز تدلق على الطفل ده جردل مياه ساقعة، اللي هو ليه يا بابا كده؟
اللي مقضياها في المطبخ – الشيف الشربيني
هتلاقي ست الكل عاملة على السفرة كل ما لذ وطاب، ولازم البوفتيك علشان ماحدش يقول حاجة، وفي الأخر هتلاقي الناس اللي عازمينهم اتنين تلاتة ولا حاجة، بس لازم السفرة تبقى فيها كل الأصناف، أنت عايز الناس تاكل وشنا؟
اللي بيلف ويدور علشان العيدية – المادي
إوعى يا سعيد تبطل تاخد عيدية من أمك مهما كبرت أو رجلك كبرت ? #روتانا_سينما #عيد_الفطر
Posted by Rotana Cinema on Friday, June 15, 2018
تلاقيه بيدحلب وعمال يلف ويدور على كل واحد وطالع نازل وبيوزع التهاني علشان العمة أو الجدة تكرمش له العيدية، وبتلاقي بعدها كل الأطفال متجمعين وواقفين صفوف علشان ياخدوا العيدية.
اللي عنده مشكلة مع كل الأكل – النباتي
اللي عنده مشكلة مع كل الأكل مش بياكل لحمة ولا أي حاجة مدبوحة ولا بياكل رنجة وفسيخ، وفي وسط وليمة العيد بيقضيها سلطة وعصير، والغريب إنهم كل مرة بيسألوه، إيه ده هو أنت مابتاكلش لحمة؟ إيه ده أنت مالكش في الرنجة والفسيخ؟
في شخصيات أكتر وأكتر، اللي على رغم غرابتهم، بس بيحلوا كل عيد ولما يهلوا علينا بنقول بشكل تلقائي “جانا العيد أهو جانا العيد “.
