المسلمين في العالم كله مستنيين الاحتفال بعيد الفطر المبارك، واللي اتسمى عيد علشان بيعود على المسلمين بالفرح والبهجة والسعادة كل سنة، وهو احتفال بإتمام فريضة الصوم، ويعتبر مناسبة دينية في المقام الأول واجتماعية في المقام التاني. ورغم تشابه عادات الاحتفال بالعيد بين المسلمين في العالم كله، إلا إن كل ثقافة لها بعض العادات المميزة، ومصر واحدة من الثقافات اللي لها عاداتها الخاصة في الاحتفال بالعيد.
وكواحد مصري بيمثل له العيد يوم مميز من الفرح والسرور والدفء العائلي، كان لازم أكتب عن أهم العادات المصرية اللي بتمثل احتفالية شعبية بالعلاقات الاجتماعية والعائلية وصلة الرحم الممزوجة بالنعمة والحبور.
شراء لبس العيد
الاحتفال بالعيد بيبدأ في آخر عشر أيام من شهر رمضان المبارك، فبتلاقي أغلب الأسر المصرية برا البيت رايحة تشتري لبس العيد للأطفال والكُبار، وده بيمثل للأطفال والبالغين على حد سواء فرصة للسعاة والفرحة باللبس الجديد. لسه فاكر لما كنت طفل وبجيب لبس العيد وأفضل حاطه قدامي ومستني العيد بفارغ الصبر علشان ألبسه وأنزل به، وبجهزه وأصحى من الفجر يوم العيد علشان ألبسه وأنزل أعيد.
عادة شراء لبس العيد هي فرصة لإسعاد الأطفال وتوطيد العلاقة ما بين الأهل وأبنائهم، اللي بيسعدوهم بلبس جديد وتوقعات مبهجة ليوم العيد اللي هيكون كله فرح وسعادة.
خبيز العيد
تستمر الاحتفالية بالعيد في آخر عشر أيام في رمضان وجزء من الاحتفالية دي هو خبز الكحك والبسكوت وحلويات العيد، وبالنسبة لي شخصيًا أيام “خبيز العيد” كانت أحلى من العيد نفسه، وكانت أمي وخالاتي وإخواتي البنات يتجمعوا ويكسروا البيض ويخلطوه باللبن والدقيق والسكر والزبدة ونقعد نقطع الكحك ونشم ريحة الحلويات في الفرن، الريحة دي بالنسبة ليا هي الفرحة الحقيقية بالعيد.
ورغم إن معظم الناس بقيت بتشتري كحك العيد جاهز، إلا إن عادة “خبيز العيد” دي كانت بتجمعنا كعيلة مع بعض واحنا بنقسم المهام ومبسوطين بروايح الكحك السخن وبنغني “والله لسه بدري يا شهر الصيام”. عادة خبيز العيد هي عادة اجتماعية واحتفال بالعائلة في المقام الأول.
تنضيف البيت وزيارة الكوافير والحلاق
وقبل العيد بيوم أو يومين، البيت بيتقلب من فوقه لتحته، ويتلم السجاد والستاير وتروح للمغسلة ونغرق البيت مياه وصابون وندعكه الدعكة اللي هي، وننضف كل ركن فيه ونخليه فلة.
العادة دي تظل واحدة من أجمل العادات اللي بتجمع الأسرة الواحدة مع بعض في التجهيز لفرحة العيد، ورغم إن تنضيف البيت للعيد هو واحد من أصعب المهام في العالم، إلا إني كنت أنا وماما وإخواتي مبسوطين حتى واحنا عمالين نزعق لبعض ونصوت. وتيجي ليلة الوقفة ونفرش البيت ونقعد بعد ما ضهرنا اتكسر من التنضيف، وماما تكون مبسوطة بالبيت وهو نضيف وبيلمع كده، النظرة دي في عنين ماما بالدنيا كلها.
وبعد كده، الولاد ينزلوا للحلاق والبنات تروح الكوافير، ولازم نحجز قبلها بكذا يوم وندفع مقدم، علشان قبل العيد بيومين مش هتلاقي حلاق أو كوافير فاضي، ونرجع بقى بقصات الشعر مستعدين للعيد.
سهرة الوقفة للصبح
قصينا شعرنا وظبطنا نفسنا في الكوافير؟ ننزل بقى نسهر مع صحابنا وإخواتنا وولاد خالنا وعمنا، ونقعد معاهم للصبح على قهوة أو كافيه أو حتى في بلكونة البيت نرغي لحد الفجر، وأول ما نسمع الفجر، نشرب مياه كلنا وناخد الشاور الجامد ونلبس لبس العيد وننزل نصلي صلاة العيد.
صلاة العيد والشاي باللبن والكحك
صلاة العيد هي بداية يوم العيد الحقيقية، ولحد النهارده ماينفعش تفوتني صلاة العيد، علشان لو فاتتني يبقى كده خلاص العيد كله راح عليا.
ننزل مع إخواتنا وقرايبنا جماعة ونروح أقرب جامع للبيت واحنا متشيكين وحاطين برفانات بقى وشكلنا قمر علشان نصلي العيد، وبعد الصلاة نقف في الشارع نعيد على الجيران والمعارف ونعلق على لبس العيد ونظبط الخروجات والمقابلات.
وبعد ما نروح البيت، نلاقي ماما مجهزة لكل واحد كباية الشاي باللبن وأطباق الكحك والبسكوت، ونقعد نرغي بقى ونقول مين كان لابس إيه في صلاة العيد، وهنعمل إيه في العيد.
توزيع الكحك على الجيران
تيجي الساعة عشرة وماما تجهز أطباق كتير مليانة كحك وحلويات العيد اللي عاملينها بنفسنا، وأنزل أنا وإخواتي نوزع الكحك على جيراننا المسيحيين اللي بيبعتولنا الأكل والحلويات في أعيادهم، ونقولهم: “ماما بتقولكم كل سنة وأنتوا طيبين”. ونروح بالحلويات لجيراننا اللي مش عاملين حلويات العيد السنة دي علشان عندهم حالة وفاة أو ظروفهم مش كويسة ونقولهم برضه: “ماما بتقول لكم كل سنة وأنتوا طيبين”.
وبعد كده يعدوا علينا جيراننا بالأطباق مليانة فاكهة أو أكل من عندهم، والبيت يبقى مزحوم بالجيران اللي جايين يقولوا لماما كل سنة وأنتي طيبة.
العادة دي بتنشر الحب بين الجيران، وبتخلي الجيران يبقوا دايمًا عارفين ظروف بعض وعارفين مين محتاج إيه ويقدروا يساعدوه ازاي، وأهم حاج بتخلي الجيران يدوا بعض شكل من أشكال الدعم العاطفي والاجتماعي لما نسأل عن بعض ونزور بعض.
الزيارات العائلية وتوزيع العيدية
ييجي المساء، قبل العصرية كده بشوية ونتغدى حاجة خفيفة واحنا بنشوف مسرحية اتعرضت ألف مرة في ألف عيد قبل كده على التلفزيون، ونسيبها شغالة في الخلفية ونتكلم مع بعض كأسرة ونتعاتب ونضحك، وبعد العصرية كده تبدأ زيارات العائلة، سواء احنا ننزل نزور أهلنا أو نستقبلهم في البيت ونعملهم غداء.
عيلتي في الصعيد كان عندها عادة إن ماما تستنى إخواتها الولاد لحد المغرب يعدوا عليها مع أولادهم علشان يدوها العدية واحنا ندي ولادهم العدية، وبعد المغرب ننزل احنا نزور إخواتي البنات في بيوتهم علشان نديهم العدية ونتعشى عندهم.
الخروجات
أول ما نصلي العشاء، نبقى أحرار بقى من الزيارات العائلية ونقدر ننزل نقابل صحابنا ونشوف هنخرج فين، هنروح سينما ولا ملاهي ولا هنروح جنينة، ولا هنتمشى في مكان وناكل ونرخم على بعض.
مهما كان سنك، هيفضل العيد فرحة، وعلشان عادات المصريين اللي فوق دي بتمثل أهم الروابط العائلية والاجتماعية اللي بتخلي المجتمع المصري متماسك وقادر يواجه تحديات العالم، يبقى لازم نحترمها ونقدرها ونخليها عايشة طول العمر.