بنحتار نعمل إيه كل يوم جنب الغدا عشان نفتح نفسنا ونفس اللي حولينا على الأكل، وعلشان كدة اختارنالكم 5 وصفات سهلة لبعض السلطات والمقبلات العربية سريعة التحضير..
الفتوش
هنحتاج كوباية بقدونس، ونص كوباية نعناع، وجزرة مقشرة، وعود بصل أخضر، و3 حبات فجل، وشوية خس، وحبة طماطم، وحبة خيار، وحبة فلفل رومي، وكل ده هيكون مفروم، مع رغيف عيش شامي متقطع بعد ما يكون محمص.
هنخلط كل ده مع بعض في طبق، ونسيب العيش للآخر، وهنعمل الصوص بخلط نص كوباية عصير ليمون، ونص كوباية زيت زيتون، وفص ثوم مفروم، ومعلقة ملح صغيرة، ومعلقتين دبس الرمان، وربع معلقة فلفل أحمر حلو. هنحط الصوص على المكونات ونقلبهم كويس سوا علشان الصوص يتوزع، بعد كدة نوزع العيش على الوش.
التبولة
هنحتاج ل3 حبّات طماطم متقطعة صغيرة، وكوباية بقدونس متقطع، وكوباية أوراق نعناع مفروم، وحبتين بصل أخضر مفروم، وحبتين خيار مفروم، وربع كوباية برغل، وربع كوباية ماء، وربع كوباية عصير ليمون، وربع كوباية زيت زيتون، وملح وفلفل حسب الرغبة، وأوراق خس للتزيين.
هننقع البرغل في الماء ونسيبه على جنب لمدة ربع ساعة، بعدين نغسله، ونصفيه من المياه في طبق، ونزود عليه كل المكونات، ونقلب الخليط كويس جداً، وبعد كدة نزينه بورق الخس.
البابا غنوج
هنحتاج كوباية طحينة، وحبة بتنجان رومي متوسّطة الحجم، ومعلقتين كبار من البقدونس المفروم، ومعلقة صغيرة من الثوم المفروم، وكمية مناسبة من عصير الليمون حسب الرغبة، ومعلقة كمون صغيرة، ومعلقة ملح صغيرة، ومعلقة شطة صغيرة.
هنشوي حبة البتنجان بقشرتها على نار هادية علشان متتحرقش لغاية ماتكون طرية، بعد كدة نقشرها، ونهرسها بشوكة، ونضربها في الخلاط مع باقي المكونات، ماعدا البقدونس، لغاية ما قوامها يبقى ناعم، ونحطها في طبق ونزينها بالبقدونس.
حمص بالطحينة والطماطم المجففة
هنحتاج علبتين حمص، و3 معالق عصير ليمون كبيرة، ومعلقتين زيت الزيتون، و10 فصوص ثوم مشوي، ومعلقتين كبار طحينة، وربع كوباية طماطم مفرومة، ونص معلقة ملح وفلفل، ومعلقتين أو 3 معالق كبار مياه، حسب الاحتياج.
هنقشر الثوم، وندهنه بزيت الزيتون، ونلفه في فويل، ونشويه في الفرن لمدة نص ساعة، بعد كدة نسيبه يبرد، وهنضرب المكونات كلها في الخلاط لغاية مانلاقي أن قوامه مظبوط، مايكونش سايب أوي، ولا جامد أوي.
فتة البتنجان بدبس الرمان
هنحتاج حبة بتنجان مقشر، ومتقطع مكعبات، ومعلقتين معجون طماطم، ومعلقة كبيرة دبس الرمان، ونص كوب مياه، ورغيفين عيش متقطع، ومحمص.
هنقلي البتنجان، ونزود عليه على النار معجون الطماطم، ودبس الرمان، ونقلب المكونات، بعد كدة نزود المياه، ونقلب تاني.
هنحتاج للصوص كوباية لبن زبادي، وفص ثوم مهروس، ونص كوباية طحينة، ومعلقة ملح صغيرة، ونخلطهم كلهم سوا. هنجيب طبق ونحط فيه العيش المحمص، ونزود البتنجان المقلي مع صوص الطماطم، ونوزع صوص لبن الزبادي على الوش. وهنزين بالبقدونس، والرمان، واللوز المحمص.
