نهى عبيد صاحبة مبادرة مختلفة في الخير، قررت إنها تعمل فكرة “التكية” اللي كانت موجودة زمان، وكمان بأكل ممكن يبقي مش متاح لأغلب اللي بيتقدملهم إنهم ياكلوه في العادي، علشان تفرحهم وتساعد كتير من الأسر المتعففة ودور الأيتام والمشردين والمستشفيات، نهى كمان كانت بتقدم من تكية الخير خدمة توفير وجبات صحية لمرضى كورونا في عز أزمة إنتشار فيروس كورونا في مصر.
بعد ما رجعت لمصر، أول حاجة كانت بتفكر فيها هي مساعدة المحتاجين، و قدرت إنها تستغل شطارتها في المطبخ ونفسها الحلو في الأكل، في مشروع خيري بيقدم المساعدة من ناحيتين، بيوفر وجبات لذيذة لأسر وجمعيات كتير، وكمان بيوفر فرص عمل للستات اللي محتاجين لشغل بإنهم يساعدوها في طبخ وتجهيز الوجبات، وأسست المطبخ بالفعل اللي مقره في المعادي، بمشاركة 5 من أصحابها.
نهى جمعت بنفسها بيانات للمستحقين سواء كانوا أسر غير قادرة بسبب عجز رب الأسرة أو لأي ظروف، وكمان دور الأيتام والمسنين، المرضى في المستشفيات، والمشردين، وبتقدملهم الوجبات اليومية، والتكية قائمة بالكامل على التبرعات سواء من نهى أو دايرة معارفها اللي مخصصين مبلغ كل شهر للتكية، وكمان بتقبل المساعدات العينية والمساعدة بالمواد الغذائية نفسها.
أكتر حاجة بتفرحها لما تشوف الأطفال وهما بياكلوا أكل مداقوهوش قبل كده وفرحتهم بيه وكل التعب بيهون لما بيشوفوا فرحتهم دي، كمان من ألطف الحاجات في التكية إنهم بيسألوا قبل ما يعملوا الوجبات للمكان اللي هيروحوه الناس هناك تحب تاكل إيه وبيعملوا الأكل اللي بيطلبوه، ومن أمنيات نهى إن دائرة المتبرعين تكبر أكتر وتقدر كمان إنها تتوسع علشان تسد ديون الغارمات وتقدم المساعدات المالية للمحتاجين إنهم يبتدوا مشاريع صغيرة تساعدهم على المعيشة وتوفر نفقات للأسر اللي ملهاش دخل، تساعدهم بيها على مواجهة صعوبات الحياة.