تم اختيار صورة “سديم الهلال وفقاعة الصابون” للمصور اللبناني وسام أيوب من وكالة الفضاء الدولية “ناسا” كـ”صورة اليوم” السبت اللي فات الموافق 17 أكتوبر، وعبر وسام عن فرحته الكبيرة باختيار صورته، وقال إنه فخور إن صورته كانت أحلى صورة تم التقاطها في العالم بأكمله يومها، والصورة بتمثله أهمية كبيرة لأنها جات بعد تعب ومجهود استغرق 10 ساعات، وده بيكون الوقت المعتاد عليه علشان يلتقط صوره، فتصوير الفضاء هو شغف وسام أيوب، وبيعرض أعماله على حسابه على موقع انستجرام.
والتقط وسام الصورة الساحرة في صحراء أبو ظبي بالإمارات، والصورة عبارة عن سحب من الغاز والغبار وسط حقول من النجوم في المجرة بتاعتنا – مجرة درب التبانة في اتجاه كوكبة الدجاجة – وهنلاقي في آخِر الصورة على الشمال فقاعة الصابون، وفي أعلى الصورة على اليمين سديم الهلال، وبيبعدوا حوالي 5000 سنة ضوئية، والسديم الكبير لوحده بيمتد حوالي 25 سنة ضوئية.
أما بالنسبة لروتين وسام في التصوير، فدايمًا بيحب يختار مواقع في الصحراء لأنه بيكون عايز مكان مظلم ومفيهوش أنوار، وبيكون متابع الأرصاد الجوية لأنه محتاج سماء خالية من الغيوم، وقمرها غائب، وجوها هادي علشان يضمن ثبات حركة أجهزته، وبيكون مرتب أجهزته التقنية اللي هيحتاجها زيّ التليسكوب وكاميرا تصوير مخصصة للأجسام الفلكية، وبيفضل وسام مركز في مراقبة سماء الفضاء، والنجوم، والأجسام السماوية لغاية ما يلقط اللحظة المناسبة وبالفعل نجح في التقاط الصورة المثالية.