الشتاء وصل والجو ساقعة، والبرد ده محتاج دفا، ومافيش حاجة تدفينا أجمل من المشاعر الطيبة، ومافيش أطيب من مشاعر الحب. ورغم إن معظم الشتاء بنقضيه في البيت أو في أماكن مغلقة، فالخروجات في الشتاء بيكون لها طعم تاني، حاجة كده آخر لذاذة.
وعلشان كده هنقترح عليكم في المقال ده خمس خروجات تقدر تروحهم مع حد بتحبه، وتقضوا وقت رومانسي وسط لسعة الشتاء وأجوائه الجميلة.
برج القاهرة: رمز الحداثة وإطلالة على القاهرة
بيتميز برج القاهرة بموقعه المتميز في وسط البلد، واللي كانت في عهد الخديوي إسماعيل “القاهرة الجديدة”، ولكن بقت بالنسبة لنا النهارده، الحي اللي جاي من زمن جميل بهندسته الرومانسية الجميلة.
بتبدأ الزيارة في برج القاهرة من الأسانسير اللي بياخد حوالي 50 ثانية علشان يوصل للقمة، وهناك تقدر تشوف منظر بانورامي جذاب لمصر كلها، الأهرامات ومبنى التلفزيون والنيل وأبو الهول والقلعة، ومن خلال النظارات المكبرة تقدر تشوف أماكن أبعد من حدود المدينة المليونية، وتحس إنك واقف على مجسم مصغر، ولكن حيوي، للمدينة الضخمة.
يمكن مايكونش الحدث ده أكتر حاجة رومانسية علشان احتمال كبير يكون زحمة، لكن في الدور الـ 14 من البرج هتلاقي المطعم الدائري، اللي كل طرابيزاته بتطل على القاهرة من نوافذ زجاجية، وبيدور حوالين نقطة الارتكاز، الأكل في المطعم الدائري تجربة جميلة جدًا وهيوفر جو رومانسي حلو مع إطلالة رائعة على القاهرة من كل الزوايا.
بيستقبل البرج الزوار طول السنة من غير أي إجازات، والتذكرة بـ 65 جنيه في لحظة كتابة المقال.
القلعة: منارة بديعة تطل على منظر بديع
القلعة واحدة من أهم آثار القاهرة، موجودة في منطقة مصر القديمة عند منطقة السيدة عائشة، وقريبة من سوق الحيوانات.
سعر التذكرة للزوار المصريين والعرب: 60 جنيه، وللطلبة المصريين والطلبة العرب: 30 جنيه، وللزوار الأجانب: 200 جنيه، وللطلبة الأجانب: 100 جنيه، لحد لحظة كتابة المقال.
قلعة صلاح الدين فيها وفرة من المعالم الأثرية الإسلامية اللي أضيفت على مر العصور، وبكده تقدر تزور حاجات كتير في نفس المكان، زيّ جامع محمد علي باشا، وجامع الناصر محمد بن قلاوون، ومسجد سليمان باشا الخادم، وبئر يوسف، والمتاحف زيّ متحف الشرطة، ومتحف قصر الجوهرة، والمتحف الحربي.
الرومانسي في زيارة القلعة هو الإطلالة التحفة على مصر القديمة من فوق أسوار القلعة، وحقيقة إنه رغم الزحمة الشديدة اللي ممكن تلاقيها، في أماكن كده هتلاقيها فاضية بالذات في ساحة جامع محمد علي، واللي فيها قعدات خشب أثرية بتطل على الأسوار ومنها على القاهرة القديمة.
القعدات دي هادية ولطيفة جدًا، وهتديك الفرصة تتكلم في هدوء وتشوف إطلالة رائعة على مصر القديمة في نفس الوقت.
فلوكة في النيل: لوحدكم!
بـ 200 جنيه تقدر تاخد فلوكة صغيرة مع حد تاني من كورنيش الزمالك أو جاردن سيتي، وتلفوا في النيل بتاع ساعتين، والملاح اللي معاكم هيسيبكم لوحدكم، وهيعملكم شاي، وهيلف بكم في الناحية اللي انتوا عايزينها.
بتبقى الخروجة دي حلوة أوي بالليل في الشتاء، علشان بيبقى النيل كله منور بأنوار القاهرة، وتقدروا تستمعتوا بالمدينة مع كوباية شاي سخنة، وقعدة لطيفة وهادية.
ويا سلام بقى لو جبتوا كام كوز درة وأنتوا نازلين ولفتوهم حلو في شنطة قماش وتاكلوهم وأنتوا في البحر مع الشاي، وتشغلوا أغنية لأم كلثوم على الراديو بتاع الفلوكة.
دار الأوبرا المصرية: بين الأوبرات والباليهات والسيمفونيات
دار الأوبرا فيه فعاليات كتير ممكن تحضروها مع بعض، من أول الباليهات والأوبرات والسيمفونيات، لنادي السينما والندوات الثقافية اللي بتقام هناك كل يوم.
ومن أكتر الحاجات اللي بحبها شخصيًا في الحفلات دي هي إنها رسمية بالكامل، يعني هتلاقي فرصة تنزل ببدلة كاملة وكرافته شيك، وصاحبتك تنزل بفستان سواريه شيك، وتعيشوا جو الناس الأرستقراطيين ده، اللي بنشوفه في فيلم “رد قلبي”.
ولو مالكش في كل ده، هتلاقي الحفلات الغنائية لمطربين مشهورين بتحبهم طول الوقت، أو ممكن تزور المتاحف اللي هناك زيّ متحف الفن الحديث ومتحف محمود مختار القريب جدًا.
قصر عائشة فهمي: أحلى سيلفي
قصر عائشة فهمي في منطقة الزمالك، على كورنيش النيل، هو قطعة من التراث المصري المعماري والهندسة الداخلية، وبتقام فيه فعاليات فنية وثقافية مختلفة طول الوقت، من معارض فنية لمهرجانات سينمائية وغيره.
القصر الجميل يعتبر أيقونة تراثية في هندسته وتصميمه الداخلي والديكورات، وهيبقى خروجة رومانسية بشكل خاص، مش بس علشان جماله وموقعه على كورنيش النيل، ولكن كمان علشان هيوفر لك مساحة رائعة للتصوير وسط التراكيب الداخلية التراثية للقصر.
القصر بيشتغل من 9 لـ 5 كل يوم بدون إجازات، والدخول بتذكرة 50 جنيه لحد لحظة كتابة المقال، وننصحك تدخل على جوجل تشوف القصر مفتوح ولا لا، لإنه بيتقفل أحيانًا بالأيام علشان بيحصل فيه تجديدات.
إيه الخروجات الرومانسية التانية اللي بتعملوها في الشتاء داخل حدود القاهرة؟ قل لنا في التعليقات على أفكارك.