في قمة تكني، قابلنا مؤسس جاليري (روح) ولفت نظرنا المنتجات اللي معروضة، وقفنا نتكلم مع صاحب الجاليري ونعرف أكتر ازاي المنتجات اللي شايفينها دي اتصنعت من الطبيعة باستخدام مواد خام غير مألوفة في تصنيع المنتجات دي، زي شنطة مصنوعة من خشب الأشجار والجلد الطبيعي، وأباجورة مصنوعة من خشب شجر الزيتون في سيوة.
صلاح مراد، مؤسس جاليري روح، حكى لنا أكتر عن المشروع بتاعه، وقال إن كل مرة بتكون المجموعة المعروضة مختلفة في كل مرة عن اللي قبلها، واللي بيحكمه في ده بيكون الفكرة الأساسية للمواد اللي هيستخدمها في المجموعة، والمنتجات مش مقيدة بشكل معين.
دلوقتي المجموعة المعروضة في قمة تكني موجود فيها شنط بأنواع وأحجام مختلفة، والمجموعة اللي بيشتغل عليها مراد للعرض الجاي هتكون للأثاث والديكور، وهكذا كل مجموعة بتكون بمنتجات مختلفة.
الخامات اللي بيستخدمها طبيعية وصديقة للبيئة، زي الأباجورة اللي صنعها من خشب شجر الزيتون الموجود في سيوة، صلاح مراد أعاد تدويرها من مجرد بقايا خشب شجرة هيتم التخلص منها في النفايات وبيتم اعتبارها مخلفات زراعية، حوّلها لقطعة فنية منحوتة بفعل الطبيعة، وكمان بيحرص على إنه يطوّع التصميم على أساس القطعة نفسها، على عكس المعروف بتطويع الخامات على حسب التصميم.
هتلاقوا كمان شنط بأحجام مختلفة، شنط خفيفة وصغيرة وشنط ضهر، علان تناسب احتياجاتك حسب الفئة العمرية كمان. والأسعار متوسطة لتشجيع المنتج المحلي، هتلاقي الأسعار بتتراوح بين 200 و300 جنيه على حسب القطعة.