روبوت مصري لفحص مصابي الكورونا وتقديم نصائح طبية للحصول على رعاية صحية سليمة

0

بعد شغل وتطوير لمدة أكتر من شهرين، قدر المهندس المصري محمود الكومي المتخصص في هندسة الميكاترونيات إنه يصمم روبوت بيتم التحكم فيه عن بعد، ويقدر ياخد مسحات من فم مشتبهي فيروس الكورونا، ويقيس درجات الحرارة، ويتعرف على الوجوه اللي مش متغطية بكمامات، ويقدم نصائح طبية للناس.

بالإضافة للدور اللي ممكن يلعبه الروبوت ده في الحد من التفاعل والتعامل المباشر بين المصابين والأطقم الطبية، ممكن نستفيد منه في الأماكن العامة اللي بتكون زحمة أغلب الأوقات وصعب التحكم في زوارها زي المولات والبنوك والمطارات، وده لأنه بيقدر يقيس درجة حرارة اللي حواليه، ويوجه الناس اللي مش لابسة كمامات.

بواسطة: فيسبوك

النموذج ده من الروبوت بيقدر ياخد مسحة البصمة الجينية، ومسحة الـ P.C.R بالنيابة عن الطبيب، وفي النموذج الجاي اللي شغال عليه حالياً المهندس المصري، هيقدر الروبوت ياخد مسحات الأنف ويحاكي حركة إيد الطبيب بدقة أكبر.

الروبوت ده بيقدر كمان يقيس الضغط والنبض وضربات القلب، وهو مزود بذكاء اصطناعي ويقدر يتكلم، وفيه إمكانيات تعقيم ذاتي عالية الجودة من تعقيم آيوني، وكيميائي، وتعقيم بالأشعة فوق البنفسجية، ويقدر كمان يوصل احتياجات المرضى من مواد غذائية وأدوية لغرفهم بمنتهى الآمان والسهولة.

“Egy Corona Robot” هو الاسم اللي أطلقه المهندس محمود الكومي ابن محافظة الغربية في مصر على اختراعه، وهو نتاج تعاونه مع مبادرة “لو تقدر تساعد ساعد” اللي تم إطلاقها في البداية لمساعدة المتضررين من الأمطار الغزيرة اللي حصلت في مصر قبل انتشار فيروس الكورونا، وبعد انتشار الفيروس كملت المبادرة علشان تساهم في الحرب ضد الوباء اللي أثر على حياتنا كلنا.

آخر كلمة: متفوتوش قراءة ناسا اختارت مبادرة رواد النيل عشان تصنع أجهزة تنفس صناعي لمواجهة فيروس الكورونا المستجد.

تعليقات
Loading...