رمضان بيبدأ وبيبدأ معاه موسم المسلسلات والإعلانات والأغاني، وناس كتير بتبقى متحمسة تشوف إيه اللي هيحصل في إعلانات السنة دي ومين هيطلع، ومين هيغني إيه وشركة مين اللي هتعمل إعلان وهتجيب مين من الممثلين أو المشاهير. والنهارده وبعد ما عدى يومين على موسم رمضان، هنلاقي إن في أغاني عملت قلبان وكانت مميزة وخطفت الأنظار وعجبت الناس واتكلمت عنها وبقت تريند زيّ إعلان تامر حسني السنة دي.
وده لإنه ولأول مرة يطلع يغني مع أولاده التلاتة تاليا وأماليا وآدم وأول مرة يظهروا للجمهور من خلال الأغنية دي، لإنه على طول كان بيحرص إنهم مايظهروش على السوشيال ميديا، بس المرة دي حب إن أول ظهور لهم يبقى مميز ويعلم مع الجمهور من خلال أغنية “رمضان كريم” واللي غنوها باللغة العربية الفصحى، وكانت بتعبر عن معاني كتير بيقدمها لنا الشهر الكريم ومناسبة للأطفال.
الأغنية من كلمات الشاعر مصطفى محمد وألحان محمود أنور وتوزيع محمد ياسر وإنتاج شركة TH Production، في البداية حب تامر إنه يشوق جمهوره بالفيديو كليب فنزل جزء من كواليس الاستديو وقت التحضير وقال “حبيت أول مرة يشاركوني في الاستوديو يبقى ده أول كلام وأول معنى ينطقوه رمضان كريم.. ومعلش اعذروني آدم نام مني هنا بعد ما سجلنا 40 تراك”
فكرة ظهور أبناء النجوم في أي مناسبة أو إعلان أو أغنية أو لو شاركوهوم لحظات مميزة في برنامج أو حتى على المسرح، ده بيضيف للفنان من ناحية تعلق الجمهور به، هو مش بس هيشوف الفنان اللي بيحبه، لأ ده هيشوفوه وهو أب وفي وسط عيلته، وازاي بيتفاعل معاهم، وده بيحصل في برامج كتير زمان ودلوقتي، بيجيبوا ممثل ومعاه أسرته يقعدوا يتكلموا ويهزروا ويضحكوا ويلعبوا، وده هينعكس على الجمهور لإنهم مش بس هيرتبطوا بالنجم فنيًا لأ ده كمان إنسانيًا.