بدأت الناس أول أيام رمضان بالكلام عن إعلان بصوت المطرب المصري عمرو دياب، وظهور مفاجئ ومبهج للاعب الكورة المصري العالمي محمد صلاح مع أسرته، إعلان مبهج بيقدم رسالة محبة وتضامن وشكر لكل اللي بيحبونا وبيدعمونا.
من كلمات نصر الدين ناجي، ولحن عزيز الشافعي، بتقدم أغنية إعلان فودافون الجديد، رسالة شكر ومحبة للناس اللي بتقف جنبنا في الأزمات وبتشاركنا الفرح، بيقول مقطع من الأغنية: “في حياتنا ناس هما الأساس”، وبيوصف أحمد حسين من خلال تويتر: “..إخراج مبهج جدًا للإعلان .. برسايل مهمة وجميلة إن احنا عايشين في الدنيا دي بالمحبة”.
وكان ظهور لاعب الكورة المصري العالمي محمد صلاح في الإعلان مع زوجته وبناته الاتنين، مكة وكيان، مفاجأة مبهجة لكل المشاهدين، اللي وصفها البعض بـ “دخول جميل جدًا لمحمد صلاح”.
وبيظهر صلاح في الإعلان وهو بيقدم رسالة شكر لزوجته على المحبة والدعم اللي بتقدمهم له كل يوم، وده اللي بيظهر من خلال كلمات الأغنية: “واقفة ديمًا جنب مني شجعتني صدقتني.. سندتني موقعتش يوم!”.
والجدير بالذكر إن محمد صلاح اتجوز في 2013 من ماجي محمد، زميلته في المدرسة، لإنه كان عايز يستقر في حياته، وبعد الجواز انتقلوا لسويسرا، وأكد في لقاء صحفي إنها وش الخير علي،ه لإنه بعد الجواز على طول انضم لفريق (تشيلسي).
وأنت يا عزيزي القارئ، إيه رأيك، عجبك الإعلان ولا حسيت الناس بالغت في رد فعلها؟