خلال تصوير إبراهيم عيسى لأحد حلقات برنامجه “مختلف عليه” بحضور الباحث الإسلامي ماهر فرغلي، حصل حادث بعد سقوط بعض من اللوكيشن، واللي تسبب في إصابات سطحية لإبراهيم عيسى وبعض العاملين، وتم نقل المصور للمستشفى لتعرضه لإصابات بعد الحادث. وكتب ماهر فرغلي ضيف الحلقة على موقعة بفيسبوك “نجونا أنا والأستاذ إبراهيم عيسى من الموت بعد أن وقع اللوكيشن أثناء تصوير حلقة في برنامج (مختلف عليه)، وإصابة مصور ونقله للمستشفى.. الحمد لله”.
ولكن الغريب في الموضوع هو ردود الأفعال الاستهزائية والقاسية اللي بقينا نشوفها من كتير من الناس على السوشيال ميديا واستسهالهم في “الشماتة” بعد تعرض الناس لمواقف أو حوادث صعبة، لمجرد عدم حبهم أو اختلافهم مع الشخص. فعلى تويتر شوفنا تويتات كتيرة فيها تريقة واستهزاق وكمان شماتة واضحة للي حصل لإبراهيم عيسى، واللي ممكن يكون واخدينه كتير من الناس على محمل الهزار.. ولكن الشماتة في أي حد مهما كان السبب ومهما كان عدم الاتفاق مع الشخص مالهاش مبرر، لإنها ببساطة ضد الإنسانية وضد فترة الإنسان السليمة اللي مابتتمناش حدوث أي مكروه لحد.
من حق أي حد إنه يختلف مع آراء شخص تاني ويبقى ضد أفكاره، ومش لازم كمان تقول إنك حزين ومتعاطف معاه لما يكون في أزمة.. ولكن أقل شيء هو التزام الصمت، لإن إظهار الشماتة وبالوضوح ده على الملأ، هيخلي مبدأ الشماتة حاجة عادية وطبيعية إن الناس تمارسها لمجرد عدم حبهم أو اتفاقهم مع حد.