غير الشكل الجميل اللي كلنا عارفينه وشايفينه عن مدينة دبي، اللي تعتبر مدينة أوروبية في الوطن العربي، ناطحات سحاب ولايف ستايل مختلف وجديد، كل حاجة حديثة هتلاقيها هناك ودايمًا في سباق مع كل جديد، فيه وجه تاني لدبي مش كل الناس تعرفه، الجانب القديم والتراثي لدبي القديمة، اللي ممكن ناس كتير تتفاجئ لما تعرف عنه، علشان كده حبينا نتكلم عنه ونوريلكم صور من مدينة دبي القديمة، وعلشان لما تزور دبي، ماتفوتش زيارة الوجهين للمدينة.
دبي اللي إحنا شايفينها دلوقتي، ابتدت حكايتها من سنة 1966 بس، من بداية اكتشاف النفط فيها وزيادة عدد السكان واهتم بيها الشيخ راشد بن آل مكتوم، وبقت مركز مهم للاستثمارات في الوطن العربي، لكن قبل التاريخ ده، دبي القديمة معالمها كانت مختلفة.
حي الفهيدي التاريخي
من أشهر أحياء مدينة دبي القديمة، حي الفهيدي التاريخي، اللي يعتبر من أهم الأحياء التراثية في الإمارات، وزيارته بتمثل رحلة مثيرة علشان تتعرف على ملامح الحياة التراثية في دبي القديمة قبل الحداثة والعصرية اللي موجودة دلوقتي، والحي ده مليان بالمباني التراثية اللي شاهدة على الحياة بدبي في الفترة من نص القرن 19 لحد القرن 20، وكمان فيه فعاليّات ثقافية وفنية متنوعة، حتى المطاعم والقهاوي على شكل تراثي مميز.
خور دبي
اللي زمان كان من أهم طرق التجارة البحرية، ودلوقتي هو من أهم المعالم السياحية هناك، والسياح بتحب تتفسح فيه بمركب تقليدي علشان يشوفوا المعالم التراثية، وطبعًا الخور وجهة مميزة لمحبي الصيد سواء كانوا من المواطنين أو السياح.
منطقة السيف
المنطقة دي بيتلاقى فيها الحداثة مع التاريخ، فلو بتحب تستمتع بالأجواء القديمة التاريخية، وفي نفس الوقت مش عايز يفوتك حداثة دبي دلوقتي، هتلاقي الاتنين في منطقة واحدة، بتمتد لحوالي 1.8 كلم تقدر تشوف فيهم الوجه التراثي والوجه الحديث لدبي.. وماتفوّتش شراء هدايا تذكارية مميزة من هناك زي العطور العربية.
ديرة
بريحة بخور عربي عتيق، وعطور عربية من المسك والعنبر، تقدر تخوض تجربة تسوق مميزة في أسواق الديرة، واحد من أقدم أحياء دبي، اللي مشهور من زمان في المنطقة العربية إن كان بيجيله التجار من البلاد المجاورة علشان يعرضوا بضاعتهم فيه، دلوقتي كمان السوق مشهور ببيع التوابل المميزة، والأقمشة والعطور والذهب.