ظهر فيروس كوفيد-19 في آواخر سنة 2019، من وقتها والعالم عايش في أكبر جائحة مرضية في العصر الحديث. اتقفلت حدود الدول وبدأت قوانين الحظر تطبق علي المجتمعات البشرية في كل حتة في العالم.
رغم ظهور لقاحات كوفيد-19 المختلفة واللي البشرية حطت عليها أمل كبير في رجوع الحياة مرة تانية لشكلها العادي، إلا إن ظهور أشكال جديدة من الفيروس ممكن تحطنا في خطر الرجوع لنقطة الصفر تاني ونرجع نطبق قواعد التباعد الإجتماعي تاني لفترات مش متأكدين منها.
واحد من المتحورات الجديدة لفيروس كوفيد-19 هو المتحور ديلتا. في المقال ده جبنالك 5 معلومات لازم تعرفها عن الشكل الجديد من الفيروس اللي قفل الحدود بين دول العالم كله لمدة سنتنين النهاردة.
ديلتا هو متحور جديد من فيروس الكورونا اللي عشنا معاه السنتين اللي فاتوا، والمتحور الجديد مُعدي جدًا. تم اكتشافه أول مرة في شهر ديسمبر اللي فات في الهند. انتشر بشكل كبير جدًا في الهند ومنها دخل بريطانيا وبعدها الولايات المتحدة، ودلوقتي يعتبر أكتر شكل منتشر لفيروس الكورونا هناك.
أهم المعلومات اللي لازم تعرفها عن متحور كوفيد-19 الجديد “ديلتا”
1- ديلتا هو أكتر شكل مُعدي من فيروس الكورونا
واحد من أكتر الحاجات اللي تميز المتحور الجديد ديلتا إنه سريع الإنتشار علي حسب كلام دكتور بيري ويلسون ، أخصائي الأمراض المعدية في جامعة يال الأمريكية. وبيقول إن المتحور الجديد هيزود سرعة انتشار مرض الكورونا حولين العالم بشكل كبير جدًا. الفيروس الجديد ظهر أول مرة في الهند في شهر ديسمبر السنة اللي فاتت ومن وقتها بقي المسبب الأول للكورونا في الهند وبريطانيا والولايات المتحدة. في نهاية شهر يوليو السنة دي كانت نسبة الإصابة بديلتا في الولايات المتحدة 80% من عدد المصابين بالكورونا.
2- الناس اللي ماخدتش اللقاح معرضين للإصابة
الناس اللي ماخدتش لقاح الكورونا معرضين للإصابة بالمتحور الجديد بشكل كبير جدا، اثبتت الدراسات في بريطانيا انه نسبة إصابة الناس اللي اقل من 50 سنة بديلتا زادت تلات أضعاف نسبة الإصابة بأشكال كوفيد-19 اللي قبل كده.
3- ديلتا ممكن يسبب انتشار واسع في العالم
نسبة العدوي بديلتا كبيرة جدًا وممكن تسبب انتشار الكورونا في العالم بشكل أسرع بكتير من قبل كده، وعلشان كده الحكومات والمنظمات الصحية في العالم بتطلب من الناس انها تاخد اللقاح في اسرع وقت علشان مانسمحش للفيروس إنه يسبب جائحة عالمية جديدة.
4- لسه محتاجين نتعلم كتير عن ديلتا
رغم كل المعلومات اللي نعرفها عن ديلتا إلا إننا لسه محتاجين دراسات وابحاث علمية كتير جدًا علشان نفهم كل حاجة عن المتحور الجديد ونفهم خصائص المسببات المرضية بتاعته.
5-لقاح الكورونا هو أحسن حماية ضد ديلتا
لحد دلوقت لقاحات الكورونا اللي موجودة بتحمي من المتحور الجديد ديلتا وعلشان كده من المهم جدًا إن كل الناس تلحق تاخد اللقاح في أسرع وقت قبل ما تظهر متحورات جديدة من فيروس كوفيد-19 وتكون اللقاحات مش بتشتغل عليها، وقتها ممكن العالم يرجع يقفل كل الحدود ويحظر التفاعلات الإجتماعية تاني ونرجع لنقطة الصفر وندور علي لقاحات جديدة.
6- ديلتا ممكن يعيش في المياه لمدة 72 ساعة
آخر دراسات روسية بتقول إن ديلتا يقدر يعيش في المياه لمدة 72 ساعة وده معناه إننا عندنا متحور جديد من الفيروس يقدر يتنقل من خلال الهوا والمياه. زيادة عدد الطرق اللي الفيروس بينتقل بيها بيسهل إنتشاره بشكل كبير جدًا وممكن يخلي الجائحة تزيد وخطورتها المرة الجاية تبقي أكبر بكتير من اللي عشناه مع فيروس الكورونا.