حوارنا مع محمد إيهاب الشريك الاستراتيجي لقمة رايز أب

في الساعات الأخيرة من انتهاء قمة رايز أب في نسختها العاشرة، اتكلمنا مع المهندس محمد إيهاب، الرئيس التنفيذي لشركة انطلاق، بمناسبة توقيع بروتوكول تعاون مع شركة (رايز أب) وباعتباره بقى شريك استراتيجي لها، وسألناه ازاي خطوة زي دي هتخدم قطاع ريادة الأعمال، واللي بيعتبر المحور والهدف الرئيسي لحدث زي قمة رايز أب.

قال المهندس محمد إيهاب: “هدفنا الأساسي هو إننا نبقى حلقة وصل بين القطاع الحكومي والشركات الناشئة، وده هيساعد إننا نشتغل على كل التشريعات والقوانين الخاصة بمجتمع ريادة الأعمال، سواء على المستوى التشريعي أو التنفيذي، وفي نفس الوقت هنساعد الشركات تفضل جاذبة للاستثمار”.

وكمل كلامه: “رايز أب كونها منصة استمرت 10 سنين أو أكتر ومكملة في السوق المصري، بدأت تخلق مجتمعات من الشركات والمستثمرين، وده خلق إلهام وتوسع لعدد أكبر، ودي أهم نتيجة وصل لها المكان”.

واضاف: “احنا في شركة انطلاق، بندعم مناخ ريادة الأعمال، وهنقدر من خلال الشراكة إننا نسد الفجوة بين الشركات الناشئة والجهات الحكومية، بجانب إننا هنقدم لهم تمويل وتدريب للشركات علشان يكبروا أكتر في السوق، بجانب تقديم خدمات الاستشارات الحكومية ونلاقي حلول بشكل سريع للتحديات اللي بيمروا بها، واللي موجودة في كل الدول مش مقتصرة على منطقة معينة أو بلد بعينها، ومن أهمها القوانين والتكنولوجيا”.

مع اختتام قمة رايز أب، شوفنا ورش وسمعنا مناظرات في التكنولوجيا والاقتصاد والسياحة، حضرها مختلف الأعمار والجنسيات بشغف ورغبة في اكتساب علم ومعرفة، ومع مجمل النقاشات اللي اتكلم عنها معظم الناس خلال الأيام التلاتة، إن مع التقدم التكنولوجي هنروح للي أبعد من الخيال.

آخر كلمة: ماتفوتوش قراءة: قمة رايز أب: لأي مدى يقدر الذكاء الاصطناعي الدخول لعالم الأزياء؟

تعليقات
Loading...