الشهر ده سمعنا خبر مفجع وهو وفاة كريم صبري، شقيق الفنان رامي صبري بطريقة مأساوية، بعد غرقه في ترعة المريوطية. طبعًا كانت صدمة إن شاب لسه في مقتبل عمره، وفنان موهوب كان عضو من أعضاء فرقة رامي الموسيقية، وشغال على ألبوم الفترة اللي فاتت وكان انتهى بالفعل من تسجيل 90% منه، إنه يفقد حياته فجأة وبالطريقة المأساوية دي.
طبعًا نظراً للظروف والفقدان اللي حصل، كان متوقف رامي صبري الفترة اللي فاتت عن أي نشاط فني حداد على روح أخوه المتوفي، ولكن بعد فترة أقنعوه البعض إن الحزن في القلب وإنه لازم يكمل حياته ويرجع لإحياء الحفلات والأفراح وإنه يرجع لفنه من تاني. فشوفناه بالفعل بيغني في فرح لاعب كرة القدم حمدي فتحي، وأعلن رامي صبري إن فترة الحداد هتنتهي يوم واحد من شهر أغسطس وهنشوف رجوعه للساحة. وامبارح نشر بوستر علشان يعلن طرح أغنية جديدة مع شقيقه الراحل كريم.
الأغنية كانت بالفعل تم الانتهاء من تسجيلها قبل حدوث حالة الوفاة، ولكن كان المفترض الانتظار لفترة قبل طرح الأغنية. لكن حالة الوفاة سرعت بطرح الأغنية علشان رامي صبري كان عايزها تنزل في التوقيت ده، حزنًا على رحيل شقيقه الأصغر وتخليدًا لذكراه. الأغنية بتحمل اسم حالة اكتئاب واللي أكيد بتعكس حالة رامي صبري الفترة دي بسبب الظروف اللي بيمر بيها، ومن المفترض إنها يتم طرحها قريبًا علشان يكون ديو العام 2021..