القصة الكاملة لنهاية شقيق رامي صبري المأساوية
استقبلت أجهزة الأمن في الجيزة بلاغ في نص الليل من مصحة لعلاج الإدمان، بتقول إن في شاب هرب من المصحة، بعد ما قضى فيها يوم واحد بس، ولما حاول العاملين في المصحة يمسكوه، نط في ترعة المريوطية وماقدروش ينقذوه، فمات غرقان! الشاب اللي بنتكلم عنه هو “كريم صبري” شقيق المطرب المشهور “رامي صبري”، وده اللي اتعرف بعد ما وصلت قوات الإنقاذ النهري وقدرت إنها تنتشل الجثة، وبعد التحريات ومعلومات من شهود العيان، قدروا يعرفوا هوية القتيل.
حادثة مأساوية بكل المقاييس من شاب لسه بيبدأ حياته، والمفروض إنه موهوب ومطرب زيّ رامي أخوه، وكان عضو من أعضاء فرقة رامي الموسيقية، وشغال على ألبومه طول الفترة اللي فاتت وانتهى من تسجيل 90% منه. وليه رصيد فني مع الملحنين والمؤلفين لإنه بدأ مسيرته سنة 2011.
إيه اللي يخلي شاب عنده 36 سنة في بداية حياته، وليه كارير إنه ياخد خطوة زيّ دي؟ كنا بنشوف زمان المدمنين هما الناس اللي ماعندهمش مستقبل أو أي حاجة حلوة في حياتهم، فبيضطروا ياخدوا الطريق ده، بس ليه بقى أي حد يمشي في السكة دي بسهولة؟ واللي معروف نهايتها، إما الجنون أو إنه يدخل السجن، أو ينهي حياته بنفسه زيّ ما حصل مع أخو رامي صبري. ولكن في الحقيقة ماحدش فيهم يستاهل ده. علشان كده محتاجين نهاية لسكة المخدرات اللي بتسرق مننا ضحايا وناس كتير بنحبها، ناس ماتستحقش ده، ناس تستحق أحسن من كده بكتير.
الحملات والإعلانات اللي بتتعمل للتوعية بخطورة المخدرات ممكن تبقى مهمة لناس بيفكروا لسه ياخدوا الخطوة دي، فالحملة تقدر توقفهم، بس ده مش كفاية، ومش هتبقى مهمة لناس وقعوا خلاص في الحفرة، الفترة اللي دايمًا منسية، هي الفترة اللي بعد ما الشخص بيبدأ يتعاطى “ماذا بعد التعاطي؟”، ازاي نقدر نطلع الشخص من الحفرة دي تاني، ومايبقاش مصيره زيّ مصير أخو رامي صبري؟