من الواضح إن الصراع ما بين أحمد عز والفنانة زينة لسه مستمر داخل قاعات محاكم الأسرة.
يوم الأحد 11 يوليو رفضت محكمة عالي الأسرة المصرية بالتجمع الخامس استئناف مقدم من الفنان أحمد عز، على حكم أول درجة، وألزم القرار عز بدفع المصاريف المدرسية الخاصة بأولاده من الفنانة زينة.
المبلغ اللي الفنان أحمد عز ملزم بدفعه هو 41 ألف و700 جنيه إسترليني، ودي قيمة المصاريف المدرسية الخاصة بعز الدين وزين الدين عن سنتين دراسيتين بس، هما 2018-2019 و2019-2020.
وكانت محكمة الأسرة في مدينة نصر حكمت قبل كده بإلزام عز بدفع مبلغ 40 ألف و700 جنيه إسترليني، قيمة المصروفات المدرسية لأولاده من زينة، عن العامين الدراسيين.
اتقدم محامي عز باستئناف علشان يقلل قيمة المبلغ واتقدم محامي زينة بطلب زيادة المبلغ بعد تقديم مستندات تفيد إن دخل عز السنوي أكتر من 100 مليون جنيه وإنه اشترى فيلا جديدة وعربية بورش. المحكمة قضت بزيادة المبلغ على عز.
وكانت المحكمة قبل كده ألزمت عز بدفع مبلغ 30 ألف جنيه مصري نفقة للأولاد ولكن بعد تقديم مستندات تفيد دخل عز وممتلكاته، المحكمة قضت بزيادة المبلغ لـ 60 ألف جنيه مصري.
وكمان الحكم طلع بإلزام عز بدفع مبلغ 42 ألف و350 جنيه مصري، قيمة مصروفات الأتوبيس بتاع المدرسة.
ذكريات أحمد عز في قاعات المحاكم: بداية حكاية “والله مش ولادي”
في شهر يناير 2014 بدأت حكاية “والله مش ولادي” في مطار القاهرة الدولي لما الفنانة زينة دخلت مطار القاهرة وهي راجعة من كاليفورنيا ومعاها أولادها التوأم وبشهادتين ميلاد أمريكيتين بيثبتوا إنهم أولاد أحمد عز.
عز طعن في شهادات الميلاد دي ورفض الاعتراف بأولاده، ومن هنا قررت زينة تلجأ للمحكمة علشان تثبت نسب أولادها لأبوهم.
المحكمة عملت تحليل البصمة الوراثية DNA بعد صراع استمر 700 يوم داخل قاعات المحاكم وفي الإعلام. تحليل البصمة الوراثية أثبت بدون شك إن الأولاد ينسبوا لأبوهم أحمد عز بعد ما أقسم بالله كتير إن “والله العظيم مش ولادي”.
ومن الواضح إن الصراع داخل قاعات محاكم الأسرة مستمر ولسه هيستمر.