الدنيا مش سهلة وأحيانًا بتبقى مليانة ضغوط، فلو ماشوفناش الحاجات الحلوة اللي فيها، ممكن نعيشها بشكل أصعب، والامتنان حاجة لازم تبقى عندنا كلنا، لإنها هتحسسنا بالسعادة والرضا حتى في الحاجات البسيطة اللي بنملكها، وللسبب ده، دي قايمة بسيطة محتاجين نقف عندها وحاجات لازم ندرك ونعرف أهميتها في حياتنا ونبقى ممتنين ليها.
الطب النفسي
حاجة من الحاجات اللي لازم نبقى ممتنين لوجودها في حياتنا، لإنها ساعدتنا كتير في وسط الضغوطات اللي بنعيشها الأيام دي، وعرفتنا أكتر عن نفسنا وازاي ممكن نتعامل معاها، ومن غيرها ماكُناش هنعرف يعني إيه صحة نفسية وازاي نبقى ناس أسوياء نفسيًا.
القطط والكلاب
الكائنات الكيوت دي قادرة إنها تغير مودك وتملى حياتك سعادة وونس وتحسسك إنها فرد من العيلة مسئول عنهم، بس بتبقى أحلى مسئولية، وقادرة إنها تحتويك نفسيًا بكل بساطة. وفي دراسات حديثة اتعملت بتقول إن الناس اللي بتربي حيوانات في بيتها أقل ناس ممكن تتعرض لاكتئاب أو تعاني من الوحدة، الكائنات دي رغم بساطتها بس قادرة إنها تديلك الأمان حتى لو أنت مش من الناس اللي بتربيها، بس مجرد ما بتلعب معاهم في أي حتة لمدة دقيقة، ممكن مود يتغير وتحس بالسعادة وقتها.
الفن
الفن والإبداع بكل أشكاله، لو ماكانش موجود في حياتنا كنا ممكن نخسر حاجات كتير قادرة إنها تخرجنا من المود، حفلة في الأوبرا، فيلم في السينما، لوحة مرسومة من كتر جمالها قادرة إنها تنطق، صوت أم كلثوم وعبد الحليم وفيروز، رقصة باليه لما تشوفها تحس إنك طاير معاها، فيلم كارتون بيدوس على حتة الطفل المستخبي اللي جواك، كلها حاجات قدرت تخرجك من أي حالة أنت فيها، وتخليك تفصل عن العالم لفترة زمنية وتبعد عن مشاكله وهمومه.
العيلة والصحاب
يمكن ناس كتير بتعتبر إن وجود الناس دي حولينا أمر مسلم، وشيء بديهي إننا نبقى في حياتنا عيلة وأصحاب، بس في الحقيقة الحاجات دي ممكن تكون بالنسبة لناس تانية أمنيات عايزين يحققوها، فلو احنا في حياتنا عيلة وأصحاب بيدعمونا وبيحبونا لازم نبقى ممتنين.
التفاصيل الصغيرة
زيّ المشي على البحر، ضحكة طفل صغير، إنك تستمتع بالشمس، أكلة حلوة وسرير دافي بعد يوم طويل مليان تعب، الشتا والتفاصيل المرتبطة بيه وصوت وريحة المطر اللي بتغسلنا من جوا، والأيس كريم، حتى لحظات الفشل واليأس لازم نفكر فيها بشكل مختلف لإن لولاها ماكُناش هنحس بقيمة إننا نحقق حاجة في حياتنا، وأخيرًا لازم نبقى ممتنين إننا لسه أحياء وعايشين، وعندنا فرصة إننا نقابل ناس جديدة ونتعلم حاجات أكتر.