أعمال درامية ماتتنسيش من تاريخ نور الشريف

في نجوم كده مابيتكرروش كتير، من موهبة ورقي وثقافة في نفس الوقت، ونور الشريف عنده الكوكتيل ده، خليط مابيتجمعش ومش بنشوفه غير كل فين وفين، وكل ما كان بيكبر بيزيد نضجه وأدائه في التمثيل وتقمصه في لبس كل شخصية، وحرفية في تطويع إمكانياته في خدمة كل دور.. وفي ذكرى وفاته هنسلط الضوء على أبرز أعماله الدرامية اللي كانت جزء كبير من تاريخه.

لن أعيش في جلباب أبي

وفاة نجم مسلسل "لن أعيش في جلباب أبي" | أحداث نت
عن: أحداث

عبد الغفور البرعي وفاطمة كشري وعبد الوهاب ونظيرة ونوفا شخصيات فضلت عايشة معانا، ولسه لحد دلوقتي لما يتعرض بيعمل تريند على السوشيال ميديا، وخصوصًا فرح سنية ومشهد البوفيه، مسلسل مر عليه أكثر من 20 سنة ولسه كإنه أول مرة يتعرض. الناس اتعلقت به بسبب الحالة اللي عيشنا فيها ، وهى تجسيد صورة وحالة الأسرة المصرية بكل تفاصيلها بدون أي تكلف حتى في لغة الحوار والخناقات وقعداتهم ومشاكلهم، حاجات بنعيشها كل يوم لقينا متجسدة في عمل فني.

المسلسل متاخد من رواية إحسان عبد القدوس بس طبعًا مع تغيير حاجات في طبيعة الشخصيات والأدوار الرئيسية والحبكة بشكل يتناسب مع طبيعة العمل الدرامي، عبد الغفور راجل عصامي بنى نفسه بنفسه مشكلته الأزلية مع ابنه، كل واحد شايف الحياة من منظور مختلف، ده عايز يربي ابنه زيّ ما اتربى والتاني عايز يخرج من عباءة والده “الراجل الغني” وماشي طول حياته بيدور على نفسه بعيد عن شهرة وفلوس والده.

حضرة المتهم أبي

من إنتاج 2006، مسلسل تربوي من الدرجة الأولى اتكلم عن الصراع بين الطبقات في المجتمع وبين الأجيال المختلفة، قدم لنا رسالة ازاي نربي أولادنا في وسط كل الاغراءات اللي بيشوفوها في مجتمعنا الحالي من غير ما يفقدوا مبادئهم واللي اتربوا عليه، مشهد نهاية المسلسل اللي كان في المحكمة لخص حالنا دلوقتي وفي اللي ممكن توصل له أجيال كتير وهما بيجاروا الناس اللي حواليهم، واتكلم عن السبب الرئيسي في إن الأجيال بتتطلع مشوهة وغير سوية، مشهد يتكتب فيه كتب عن التربية، وأداء تمثيلي من نور الشريف في رأيي الشخصي ياخد عليه أوسكار.

ومن الحاجات المميزة برضه في العمل الفني ده هو أغنية المسلسل؛ من كلمات أحمد فؤاد نجم وغناها مدحت صالح واتقال قبل كده إن في كواليس تسجيل الأغنية ماقدرش مدحت صالح إنه يتمالك دموعه من شدة تأثره بكلام الأغنية واللي كانت بتتكلم عن علاقة الأب وابنه ومكتوبة بطريقة رسالة عتاب تقشعر جسم اللي يسمعها.

عائلة الحاج متولي

عن: al-arrab

تلاتة على واحد إيه؟ يادوب

وأربعه على واحد؟ حراام

اتعرض في 2001 في شهر رمضان على 12 محطة عربية، الحاج متولي وزوجاته الأربعة؛ مديحة ونعمة الله وأمينة وألفت، المسلسل ناقش مشكلة تعدد الزوجات في شكل اجتماعي كوميدي، الحاج متولي تاجر القماش ابن البلد واللي عينه طول الوقت على الستات بيحاول يبرر لنفسه ضعفه قدام الستات ويقول “الشرع بيقول كده”، المسلسل وقتها تقريبًا مصر كلها اتكلمت عليه وعمل صدى في وسائل الإعلام كبير. وفي ناس انتقدت نهايته واعتبروها مش منطقية ومش منصفة للستات في وقت كانوا بيحاولوا يغيروا صورة المرأة في في الدراما المصرية.

عمر بن عبد العزيز

«الأعمار بيد الله وأتمنى يوم ما أموت يذيعوا المشهد ده».

 مسلسل تاريخي ديني جسد فيه نور الشريف شخصية الخليفة الأموي عمر بن عبد العزيز المشهور بالصلاح والعدل، والملقب بخامس الخلفاء الراشدين. في جملة قالها نور الشريف في آخر أيامه في إحدى المقابلات التلفيزيونية لما كان بيتكلم عن مسلسل “عمر بن عبد العزيز”، وكان قصده وقتها على مشهد موت سيدنا عمر وقال إنه مهما درس وخد خبرة بعدها بس بييجي عند المشهد اللي مثله في المسلسل ده واحساسه بيبقى مختلف، عاش خلال المشهد لحظة ربانية ماتتنسيش وماتكررتش بعدها في أي مسلسل تاني، لحظة لما سيدنا عمر شاف قبل وفاته الصحابة اللي سبقوه وهو فرحان إنه رايحلهم، نور الشريف عن المشهد ده إنه أعظم مشهد عمله في حياته.

ماتخافوش

يعتبر من أجرأ المسلسلات اللي عملها نور الشريف، مكرم بدوي صاحب قناة فضائية وبيقدم فيها برنامج اسمه “ماتخافوش”، المسلسل جريء في طرح القضايا والبرنامج اللي بيقدمه وسيلة لطرح القضايا دي، يقول للناس مايخافوش وقولوا اللي في قلبكوا وعلى المستوى التاني، المسلسل ناقش فكرة فضح الحركة الصهيونية والفرق بينها وبين الديانة اليهودية واللي دايمًا بيحصل بينهم خلط عند ناس كتير، واتكلم عن فكرة الأرض والمواطنة والوطن والهوية العربية والقضية الفلسطينية، مسلسل حقق نجاح كبير وجدل كبير كمان لإنه اتصنف كمسلسل سياسي من الدرجة الأولى.

آخر كلمة: ماتفوتوش قراءة: معانا رغم وفاتها.. رجاء الجداوي بتطل علينا من جديد بأعمال فنية

تعليقات
Loading...