لرحلته الفنية وتأثيره على صناعة السينما المصرية، مهرجان الجونة السينمائي هيكرم النجم أحمد السقا في الدورة الخامسة للمهرجان 2021 بجائزة الإنجاز الإبداعي، تقديرًا لمسيرته السينمائية الاستثنائية ومساهمته في صناعة السينما المصرية لأكتر من 20 سنة، ولأدواره اللي لحد دلوقتي بنحب نتفرج عليها تاني، من أكشن لكوميدي، السقا مافشلش يخلينا نتعلق بالشخصيات اللي قدمها في أدواره على مدار مسيرته الفنية كلها.
السقا اتخرج من المعهد العالي للفنون المسرحية، وبدأ انطلاقته في التليفزيون بمسلسل من الذي لا يحب فاطمة، مع نجوم كبار زيّ يحيى الفخراني وإلهام شاهين، وقدر يثبت نفسه وتمثيله من وقتها، أما في السينما، ابتدت شهرته من صعيدي في الجامعة الأمريكية، اللي لحد دلوقتي مابنبطلش نتفرج عليه، ويعتبر أيقونة مميزة في السينما المصرية خصوصًا للشباب، وقتها الفيلم كان بيقدم مفهوم “سينما الشباب” للجمهور المصري، وقدم مجموعة شباب قدروا يبقوا أكبر مشاهير الساحة الفنية، وكمان وقتها الفيلم حقق أعلى إيرادات في تاريخ السينما المصرية، ولحد دلوقتي، بلغتنا احنا كشباب الفيلم لسه تريند لحد دلوقتي بيتعمل منه ميمز، حتى أغاني الفيلم لسه بنحب نشغلها.
يعتبر السقا رائد سينما الحركة الحديثة في الشرق الأوسط، واشتهر بإنه بيقوم بمشاهد الأكشن والمشاهد اللي بيكون فيها خطر بنفسه من غير ما يستعين بدوبلير، ومسيرته السينمائية بتضم 11 فيلم بإنتاج ضخم، ولا مرة فيهم السقا خذلنا، سواء بأكشن أو كوميدي، زيّ أفريكانو وتيتو ومافيا والجزيرة وابراهيم الأبيض والمصلحة وابن القنصل، حتى في الرومانسي زيّ عن العشق والهوى وتيمور وشفيقة.
أما عن الجائزة نفسها، فجائزة الإنجاز الإبداعي تعتبر تقليد سنوي لمهرجان الجونة السينمائي، بتقدم للي قدروا يسيبوا بصمتهم المميزة بأعمالهم الفريدة في مجال السينما، وحصل عليها قبل كده نجوم كبار مصريين وعالميين، المصريين اللي حصلوا عليها كانوا عادل إمام ومحمد هنيدي وخالد الصاوي وداوود عبد السيد وأنسي أبو سيف، أما النجوم العالميين، كانوا فوريست ويتاكر وسلفستر ستالوني وجيرارد ديبارديو.