مسلسل عدى عليه حوالي 30 سنة لكن لحد دلوقتي الناس بتشوفه، وبنسأل أسئلة زي “ليه المسلسل عايش معانا؟” وأسئلة تانية متعلقة بكل شخصية من شخصياته وعلى رأسهم شخصية “عبد الغفور البرعي”.. ولحد دلوقتي بنحلل الشخصيات وهل كانت بالصورة النمطية الليمعروفة عنهم من وقت عرض المسلسل ولا ممكن نحللها بمنظور آخر؟ فهل كان الأب المثالي والشخصية المثالية في رواية أحدهم ولا لأ؟
هل مستر حاج عبد الغفور كان الأب المثالي؟
لو جينا بصينا عن حياته في البداية هنلاقيه رجل مكافح ابتدى من الصفر بفرشة على الرصيف جنب عربية الكشري ومنها بدأ مسيرته في عالم التجارة والخردة ومنها برضه بدأت علاقته بفاطمة كشري، وفضل يحط القرش على القرش ويسقي السميط في الشاي علشان يوفر، ويشتغل صبي عند الكبار لحد ما بقى صاحب إمبراطورية عبد الغفور البرعي فالرحلة دي كانت نقطة تتحسب له.
والنقطة التانية هي إنه ماكنش بيجبر ولاده على أي حاجة لا في التعليم ولا في الجواز، في التعليم مثلًا نوفا وسنية وبهيرة ماكملوش تعليمهم للآخر لكن نظرية كملت لحد ما وصلت للجامعة الأمريكية وده كان بناء على رغبتها، وساعة انفصال نوفا وسنية ماكنش الأب اللي بيجلد ويقول الكلام التقليدي اللي بتقال في المواقف دي “أكيد أنتي اللي غلطانة” و”بطلي دلع وروحي على بيت جوزك” لأ بالعكس كان سند وظهر ولما رفضت ترجع لجوزها وقالت كله إلا كرامتي أبوها شجعها وخلالها تبص لنفسها على إنها ملكة في بيته معززة مكرمة.
بس لو جينا عند عبد الوهاب ماكوناش عارفين مين اللي غلط والصح في العلاقة دي، واحترنا معاهم وده كان السبب الأساسي اللي خلى عبدالغفور يخسر نقطة عندنا، هل ابنه كان فعلًا هو اللي صح في إنه مش عايز يعيش في “جلباب والده” ولا يقرب من أي حاجة تخصه، ولا مسيو برعي هو اللي غلطان علشان بعد عن ابنه من الأول ووقت لما اتربت له عقدة من وهو صغير بسبب نجاحته هو ماكنش موجود علشان يفهمه ويحتويه وساب العقدة تجرب جواه؟ طب لو عبد الغفور أب مثالي ليه ده ظهر بس لما هما كبروا وماكنش باين أي حوار بينهم في مرحلة الطفولة؟
بس بغض النظر عن كل ده عبد الغفور وأن الناس اختلفت في علاقته بابنه بالذات بس اللي كان المتفق عليه هو أنه برغم كل ده كان أب مصري أصيل وتقليدي بكل مشتملاته.
آخر كلمة: ماتفوتوش قراءة: الكاتبة غادة عبد العال: عن حواديت قطفتها ونسجتها في عمل فني