بأفلام هيكون عرضها الأول عالميًا في مهرجان القاهرة السينمائي الدولي، وعروض أفلام متنوعة في قاعات عرض العاصمة، مهرجان القاهرة السينمائي الدولي بينطلق في دورته الجديدة يوم 13 نوفمبر. والنهارده كان المؤتمر الصحفي اللي تم فيه الإعلان عن تفاصيل كتير تخص المهرجان والضيوف والأفلام المشاركة، ومفاجأة ترميم أفلام مصرية بنحبها هنشوفها بجودة أعلى، وكمان الجوائز والنجوم اللي هنشوفهم في لجان التحكيم، وطبعًا السؤال المتوقع عن اللبس والزي الرسمي في دورة السنة دي، حضرنا لحظة الإعلان عن كل ده وهنقول لكم كل التفاصيل.
المسابقات
السنة دي هنشوف 97 فيلم من 52 دولة بيتنافسوا في المسابقات المختلفة اللي بينظمها المهرجان، والمسابقات بتتنوع بين المسابقة الدولية، ومسابقة آفاق السينما العربية، ومسابقة أسبوع النقاد، ومسابقة الأفلام القصيرة، والعروض الخاصة والبانوراما الدولية. الأفلام المشاركة بتتنوع في مواضيعها وثقافتها وكمان المجتمعات اللي بتعبر عنها. وكل ده هيكون متاح خلال فترة فعاليات المهرجان، وتقدر تشوفهم وتحجز التذاكر عن طريق موقع المهرجان.
لجان التحكيم
السنة دي المهرجان اختار المخرجة اليابانية “ناعومي كاواسي” علشان تكون رئيسة للجنة التحكيم في الدورة الـ44. ناعومي كانت أصغر مخرجة حصلت على جائزة الكاميرا الذهبية من مهرجان كان السينمائي سنة 1997 عن فيلمها الروائي الأول “Moe no Suzaku”، ده غير إنها كسبت 3 جوائز مختلفين من نفس المهرجان عن أفلامها “Mogari no mori” سنة 2007، و”Hikari” في 2017.
وفي لجان التحكيم السنة دي هنشوف نجوم بنحبهم منهم نجوم شباب، زيّ الفنان “أحمد مجدي” اللي موجود في لجنة تحكيم جائزة أفضل فيلم عربي، ومعاه في نفس اللجنة الفنانة اللبنانية “نور”. وفي مسابقة أسبوع النقاد الدولية، هنشوف الفنان “كريم قاسم” في لجنة التحكيم. ده غير عدد من الفنانين العرب والأجانب في لجان التحكيم.
الأفلام اللي تم ترميمها
من أكتر الحاجات اللي مستنيينها إننا نشوف أفلام مصرية قديمة حبيناها، نشوفها بعد ما ردت فيها الروح بعد ما تم ترميمها. السنة دي كان مفروض هنشوف فيلم “خلّي بالك من زوزو” للفنان حسين فهمي والفنانة سعاد حسني، لكن تخليدًا لذكرى المخرج علي عبدالخالق اللي رحل عن عالمنا السنة دي، تم ترميم فيلمه “أغنية على الممر”. وهنشوف كمان فيلم “يوميات نائب في الأرياف” من إخراج توفيق صالح، وفيلم “الاختيار” من إخراج يوسف شاهين.
ودي خطوة مهتمين نشوفها في الدورات الجاية من المهرجانات السينمائية، لإحياء تراثنا وتاريخنا السينمائي بجودة تناسب العصر الحالي.
البوستر
تم الكشف عن بوستر المهرجان في الدورة الـ44، والفنان حسين فهمي كلمنا عن تفاصيل التصميم والفكرة وراه، وقال: “السينما جسر الثقافات، فالحرب والسياسة تفرّق والفنون تصل ما تفرقه الحروب، والفن لغة دولية أبجديتها ملك للجميع”.
وعن كواليس الفكرة، وضح: “في بداية شغلي في المهرجان اتناقشت مع فريق العمل لتحديد ملامح الدورة، وعن الخطوات الجديدة اللي ممكن نتخذها في ظل مشهد بيسيطر عليه شبح حرب دولية غيرت المشهد الاقتصادي العالمي وأثرت بشكل مباشر علينا محليًا”.
قاعات العرض
الأفلام هيتم عرضها خلال فعاليات المهرجان في قاعات مختلفة؛ 3 قاعات في دار الأوبرا المصرية، وقاعتين في سينما ومسرح الهناجر، وقاعتين في سينما الزمالك، وقاعة إيوارت.
وغير كل التفاصيل اللي تم الإعلان عنها، الفنان حسين فهمي بيحب المفاجآت، وعلشان كده حابب يشيل حاجات كتير مايصرحش عنها علشان يفاجئنا بيها في المهرجان نفسه، مستنيين نشوف دورة مختلفة واستثنائية ونعرف المفاجآت اللي مخبيها لنا المهرجان السنة دي.
آخر كلمة: ماتفوتوش قراءة: مهرجان القاهرة السينمائي بين الزي الرسمي والتجديد