بقالنا سنتين عايشين مع فيروس كورونا، اللي انتشر من الصين وأثر تأثير كبير على كل حاجة، من الاقتصاد العالمي للتعليم للعمالة للحياة الاجتماعية والصحة النفسية، الموضوع بدأ بحبستنا في البيت، بعد كده الدنيا بدأت تفتح شوية شوية، وبعد كده بدأت تفتح أوي بس على شرط اتخاذ الإجراءات الاحترازية زيّ إننا نلبس الكمامة ونغسل إيدينا ونعقمها كل شوية، ونتجنب الزحمة وناخد مساحتنا من الناس والابتعاد عنهم، ناس كتير كانت بتعمل كده، ولكن للأسف ناس كتير كان ولا هاممها، وده اللي خلانا نخسر أفراد كتير للفيروس. ولكن بعد مدة، أكتر من فاكسين أو تطعيم واحد ظهروا، وبدأوا يتصدروا لكل البلاد سواء بالمجان أو بفلوس أو بتصدير الفورميلا أو التركيبة وتصنيعها في معامل البلاد، الناس بدأت تتطمن شوية، وكتير جدًا خدوا اللقاح وكتير لسه مستنيينه وكتير خايفين ياخدوه، والحكومات بدأت تحط شروط في منع التعامل في بعض الحاجات من غير تلقي اللقاح زيّ الجامعات والمدارس والمصالح الجكومية.
وعلشان ندخل في المشكلة الكبيرة ونركز في موضوعنا، معظم الناس اللي خدوا اللقاح بدأوا يتعاملوا مع الكورونا معاملة دور البرد العادي، وبطلنا نلبس كمامات، بطلنا ناخد مساحتنا من الناس اللي حولينا، بطلنا نغسل إيدينا أو نعقمها بعد لمس أي حاجة، وبقينا نلمس أي حاجة عادي من غير خوف، فتلاقي حد جاي يكح في وشك، أو حد بيتتاوب وهو على بعد خمسة سنتي منك، وتلاقي الناس بتاكل وبتشرب من مطرح بعض، وحاجات بشعة كتير بنشوفها مش مستوعبينها، والناس فاكرة إن خلاص كده زمن الكورونا انتهى، ولكن ماحدش واخد باله بإن خطورة الفيروس هي هي زيّ ما بدأت من سنتين.
ماحدش عارف إن في ناس عادي بتاخد اللقاح وبعدها بأسبوع أو عشر أيام بيحللوا وبيطلعوا إيجابي للكورونا، ماحدش واخد باله من الأعداد اللي لسه مكملين نخسرها كل يوم بسبب الفيروس. طبعًا اللقاح مهم ولازمته إن الدنيا تهدى شوية، وإن الموضوع يكون متسيطر عليه أكتر، وعلشان نسهل إجراءات السفر ونسهل إجراءات حاجات كتير تانية، وإن كمان حتى لو بقيت إيجابي للكورونا بعد ما تلقيت اللقاح فتأثير الفيروس عليك هيكون أقل وأخف، بس ده مش معناه إننا نبطل ناخد بالنا مننا ومن اللي حولينا، لإنه ممكن يبقى خفيف عليك أه بس أنت لسه قادر تعدي غيرك، ولما تعدي غيرك، ممكن مايكونش خفيف عليه.
الفيروس لسه مش مفهوم، وكل شوية بنسمع عن تطور جديد له بيكون أصعب من اللي قبله، ولغاية ما نتأكد من كل ده، محتاجين ناخد بالنا على نفسنا واللي حولينا، فسواء خدت تطعيم أو لأ، خليك مكمل مع الإجراءت الاحترازية.