أثار الفنان المصري إيمان البحر درويش، حفيد الموسيقار الأسطوري سيد درويش ونقيب الموسيقيين السابق، موجة من الانتقادات واستفز النقابات الفنية في مصر بشكل كبير جدًا.
خلال الفترة اللي فاتت، نشر إيمان البحر درويش مجموعة من البوستات من خلال صفحاته على السوشيال ميديا، انتقد فيها طريقة معالجة الحكومة المصرية لأزمة سد النهضة مع إثيوبيا، واتهم الرئيس المصري بالتفريط في مياه النيل والسماح ببناء سد النهضة. وانتقد كمان مشروع تحلية مياه البحر اللي بدأته مصر في بدايات سنة 2020، والهدف منه تزويد المحافظات الحدودية والساحلية بالمياه بدل من نقل مياه النيل من خلال شبكات المياه للمحافظات دي.
إشاعات اعتقال إيمان البحر درويش
من الجدير بالذكر إن الفنان المصري مر بأزمة صحية خطيرة من كم شهر وحصله نزيف في المخ وجلطة بس ربنا أنعم عليه بالشفاء.
وبعد بوستاته المثيرة للجدل على السوشيال ميديا والانتقادات اللي اتوجهتله سواء من زملائه في الفن أو من الصحافة أو من المواطنين المصريين، انتشرت إشاعة إن إيمان البحر درويش تم اعتقاله نتيجة المنشورات دي.
طلع الفنان بفيديو على الفيسبوك وكان من الواضح عليه إنه متعصب واتكلم عن الإشاعة دي وأدانها وقال إنه مستعد يموت علشان بلده ووصف نفسه بإنه أعظم مغني في العالم غنى لمصر من جيبه.
وعاتب الرئيس المصري على السماح بتناقل الاشاعات دي عنه وإنه لم يقدم له الدعم في أزمته مع الهجوم الواسع اللي حصله الفترة اللي فاتت. وقال إن الرئيس يعلم كل صغيرة وكبيرة في البلد دي.
هجرة إيمان البحر درويش
في بوست على الفيسبوك نزل إيمان البحر درويش صورته وهو في الطيارة وأعلن من خلاله قرار الهجرة من مصر وكتب في البوست:
أشوف وشكم بخير.
سايبلكم العيشة الكريمة اللي عمرها ما حتتحقق في ظل هذا الظلم والفساد الذي لن ينتهي أبداً
وابقوا شوفوا البركة اللي حتهل عليكم من رب العالمين الذي لا يرضى بالذل والهوان.
سمير صبري: محامي ضد الجميع ومع البعض
التصريحات الأخيرة للفنان إيمان البحر درويش ضايقت المحامي المصري سمير صبري اللي رفع عليه قضية يتهمه فيها إنه بيهين رموز الحكومة الوطنية وبيهين ذات الرئيس المصري واتهمه كمان بالتحريض على الفوضى.
المحامي سمير صبري مشهور جدًا بقضاياه المثيرة للجدل بشدة واللي غالبًا بتتحول لقضايا رأي عام.
من أهم قضايا سمير صبري:
قضية فستان رانيا يوسف:
رفع قضية على الممثلة رانيا يوسف بعد ظهورها على السجادة الحمراء في مهرجان القاهرة السينمائي في دورته الـ 40.
دعوى القضية كانت بتدور حول فكرة المحامي المصري عن إن الفستان عاري وبالتالي “مُخل بالآداب العامة ويثير الشهوات وهو ما يتنافى مع سلوكيات المصريين”.
اتحولت القضية لجدلية رأي عام بعد ما انتشر الخبر على السوشيال ميديا، وبعدها بفترة قرر سمير صبري التنازل عن القضية وقال خلال مكالمة هاتفية مع عمرو أديب إنه هيسحب البلاغ اللي قدمه للنائب العام ضد الفنانة رانيا يوسف لإنها اعتذرت ولبسها للفستان كان “من غير قصد”.
اتهام المطربة شيرين بالإساءة لسمعة مصر:
قدم بلاغ للنائب العام بيتهم فيه المطربة شيرين عبدالوهاب بالإساءة لسمعة الدولة بعد ردة فعلها في حفلة في لبنان لما طلبت منها بنت تغني “ماشربتش من نيلها” فردت عليها شيرين وهي بتهزر وقالت “هيجيلك بيلهارسيا” وكملت “أنا بنصحها تشرب فيفيان أحسن”.
وقال في البلاغ: “في الوقت الذي تعمل فيه أجهزة الدولة جميعها على تنشيط السياحة تهكمت المطربة شيرين عبد الوهاب بأسلوب متدنٍ، أثناء إحيائها حفلًا غنائيًّا في لبنان”.
القضية دي برضه استفزت الرأي العام بشدة وسببت ضغط شديد على شيرين عبد الوهاب وكان من الواضح إنها بتمر بظروف نفسية صعبة بسبب الضغوط دي.
اتهام احمد مالك بإهانة الشرطة المصرية:
في 2016 رفع دعوى ضد الممثل أحمد مالك ومراسل برنامج أبلة فاهيتا، شادي حسين، بسبب فيديو ليهم وهما بيهينوا عساكر الشرطة، بمناسبة عيد ثورة 25 يناير، ببالونات نافخينها من واقي ذكري.
وقال في البلاغ: “الشرطة المصرية تسعى جاهدة لاستعادة الأمن بعد فترة طويلة من الإنفلات الأمني، ولا شك إن الإحساس بالأمن قد بدأ يعود نسبيًا وبشكل تدريجي، وإن الحال قد أصبح أفضل مما كان بالأمس، لكن هذا الجهد الأمني لم يكن سهلًا فقد قدمت الشرطة المصرية وما زالت تقدم تضحيات كبيرة من شهداء ومصابين”.
وأشار إن تصرف أحمد مالك وشادي حسين “أهان مشاعر كل مصري بخلاف الإهانة البالغة للشرطة المصرية، ولكل ضباطها، وجنودها، وشهدائها، ومصابينها” ووصف الفعل بإنه أكتر من جريمة وإنه لازم يتم التحقيق في التصرف ده”.