تخيل لو الحب اليومين دول بطريقة كاظم الساهر
الحب على طريقة كاظم الساهر.. قصايد ومواويل عن أحاسيسه وعن الطريقة اللي شايف بيها حبيبته وعن جمالها وحبه ليها، اختيار ألفاظ وكلمات ومعاني تقف قدامه تفكر ازاي في يوم من الأيام ناس حبت بالطريقة دي؟ وبعتوا لبعض الأغاني دي وكام واحد غناها لحبيبته، وكام واحد طلب من حبيبته تحبه على طريقة “أحبيني بلا عقد”؟ واحنا بنحلم ونتخيل، قطع حبل أفكارنا طريقة الحب اليومين دول، اللي وصلت لتهديد الحبيبة في مهرجانات لو سابته هيشرب وهيضيع.
التعبير عن الحب
أكيد من وقت للتاني كل حاجة بتتغير، حتى طريقة التعبير عن الحب، لكن كاظم الساهر من زمان وهو عارف طريقه، بيتفنن في المعاني والألحان اللي تخليه يوصّل إحساسه للمستمع، وتخلّيه يقع في الحب حتى لو هو مش مرتبط، كاظم ماتأثرش باللي بيتغير حواليه، فتخيل لو الآية اتعكست واتأثرت لغة الحب بطريقة كاظم؟
من “بت! أنت حب حياتي” لـ “زيديني عشقًا زيديني يا أحلى نوبات جنوني”.. تحس دلوقتي الراجل بيخض حبيبته، هل علشان الزمن أتغير وبعض البنات عايزة تحس إن معاها “واد صدغ” كما قالت بشرى في فيلم “وش إجرام”؟ فبالتالي الشباب لجأت للنوع ده من الأساليب للتعبير عن الحب، فلما يحب يتغزل فيها يقول لها “عسل وسكر وعيون خضراء أدمنت حبك أصبح بودرة” بدل ما يقول لها “يا قمرًَا يطلع كل مساءٍ من نافذة الكلماتِ.. يا آخر وطن أولد فيه وأدفن فيه وأنشر فيه كتاباتي”.
خلافات في الحب
بلاش، ده حتى لما حصل خلاف بين كاظم وحبيبته، علشان طبيعي الدنيا مش وردي على طول وبنحب في بعض ونكتب أشعار، كان الخلاف في منتهى الرقي، قال عنها “تلك التي أمامك الآن كانت لدي أعز إنسانة وأحببتها وهي أحبتني، صدقاً جميع الهم انستني”، مش قعد يذم فيها ويعايرها ويقول “دي حبيبتي شايله ضميرها والغدر هو مسيرها روحت قالب على غيرها أنا أصل ما بسميش”، في حين إن كاظم راح اعترف بعلاقاته وماضيه بمنتهى الأدب وقال “صارحتها وقلت مولاتي كثيرة هي كانت علاقاتي”.
علمني الحب
طب الحب بيضيف لشخصيتنا برضه ويعلمنا حاجات، وده من زمان، الحب علّم كاظم الساهر أسوء العادات على حد قوله، إيه ياعم كاظم أسوء العادات دي؟ “علمني أفتح فنجاني في الليلة الآف المرات واجرب طب العطارين.. وأطرق بابا العرافات.. علمني أخرج من بيتي لأمشط أرصفة الطرقات وأطارد وجهك في الأمطار وفي أضواء السيارات وألملم من عينيك ملايين النجمات يا امرأة دوخت الدنيا يا وجعي .. يا وجع النايات”، لكن دلوقتي، الحب علّمهم إن لو حصلت فركشة هيكرهوا حياتهم وسنينهم ويتوهوا ويشربوا خمور وحشيش.