الإبداع بيتجلّى في أزهى وأبهى صوره في عشوائيات الحياة اليومية، ماتفتكرش إنه مقتصر على شغلانات في مكاتب وشركات كبيرة وفريق إبداع بيعمل اجتماعات عمّال على بطّال، الإبداع موجود في كل حتة خصوصًا عندنا كمصريين، الشارع المصري مليان بالاختراعات والابتكارات اللي تدهش الواحد. والنهارده هنفصص ظاهرة إبداعية في اختيار إشارات وعلامات بتعتبر شفرة بين السواقين والركاب؛ إشارات الميكروباصات كل إشارة فيهم بتعني منطقة معينة، بدل ما يضيعوا وقت وينبحوا في صوتهم يقولوا خط سيرهم، أو يعطلوا الطريق، السواقين أو التباعين ابتكروا لغة شبيهة بلغة الإشارة، كل إشارة فيهم بترمز لمنطقة، زيّ إيه؟
المطبعة
الحكاية ابتدت من هنا، ميدان المطبعة هو حلقة بتوصّل بين سكان دار السلام وسكان الأحياء الأخرى، لإنه مقر للميكروباصات، والميدان فيه موقف ميكروباصات لمناطق مختلفة منهم الجيزة والهرم، السيدة زينب، الملك الصالح، المعادي وكوبري دار السلام والزهراء، علشان كده كان هو مصدر وأصل الإشارات. طب إشارته هو إيه؟ رقم أربعة. علشان النطق قريب من بعضه “مطبعة.. أربعة”، ولإن مفيش منطقة فيها علامة مميزة لأربع أبراج مثلًا، فتم إطلاق الإشارة دي على ميدان المطبعة.
الحي السابع
دي بديهية شوية، الحي السابع في مدينة نصر إشارته رقم سبعة، يعني أعمل علامة النصر، بس سيب مسافة أكبر بين الصوابع كده علشان مايبقاش رقم اتنين يبقى رقم سبعة.
الحي التامن
زي أختها، علامة رقم ۸ بالعربي، اعكس علامة النصر اللي لسة عاملها فوق، تبقى إشارة على الحي التامن بكل سهولة.
الهرم
لو حاسس إنك هتتلخبط بين علامة الهرم اللي هي هي رقم ۸، دي مفاتتش على إبداع السواقين، وخلّوا علامة الهرم مختلفة شوية، هتعمل علامة الهرم بإيديك الاتنين زيّ ما واضح في الصورة، علشان تبقى علامة تفرق بين الحي التامن والهرم. وفي حركة تانية، إنك تحط إيدك التانية تبقى بمثابة قاعدة للهرم، تفرقه عن رقم ۸.
العاشر
هنعمل رقم 10 ازاي؟ هنقلّب نور بإيدنا كده زيّ الصورة، غالبًا دي بترجع رمزيتها لرقم 5 مرتين فيبقى رقم 10؟
الدائري
هنرمز له بإيه؟ أيوة زيّ ما جيه في دماغك بالظبط، علامة دايرة شبه الراجل اللي بيعمل كنافة في رمضان كده، ودي العلامة المميزة للدائري في لغة السواقين.
الساعة
الموضوع مش في القاهرة بس، في الإسكندرية كمان سواقين “المشروع” بيستخدموا اللغة دي، والإشارة لمنطقة الساعة بتبقى عبارة عن إنك تشاور على مكان الساعة في إيدك، وبسهولة السواق هيفهم.
أول عباس
تقريبًا ده المكان الوحيد اللي بنقول أوله، فعلشان كده رقم واحد بيرمز لأول عباس العقاد، بمنتهى السلاسة كده.
أرض اللواء
بنشاور على مكان الرتبة كده في إشارة لمنطقة أرض اللواء، عبقرية التفكير وربط الأشياء ببعض.