بمرور الوقت وتطور التكنولوجيا، بدأنا نشوف في السنوات الأخيرة ديكورات وتحف معمارية في الأعمال الدرامية نقدر نقول بكل ثقة إنها مبهرة.. وإنها مش حقيقية كمان! فغالبًا الأماكن اللي بتكون مميزة ومختلفة، بتبقى عبارة عن مجرد شاشات خضراء محاطة بالممثلين، اللي بعد كده بتتحول باستخدام الكمبيوتر وبرامج الجرافيكس المتطورة، لأماكن ساحرة! والسنة دي بالذات في مسلسل لعبة نيوتن، حالفنا الحظ لما شوفنا مجموعة من الديكورات والتحف والمباني المعمارية المميزة.. وحالفنا الحظ أكتر لما عرفنا إن بعض المشاهد دي اتصورت في أماكن حقيقية، وكمان عرفنا أماكنهم فين!
منزل بقرية تونس في الفيوم
بيت سيد رجب في مسلسل لعبة نيوتن اللي انبهر بيه المشاهدين، هو بيت حقيقي موجود في قرية تونس بمحافظة الفيوم، وصاحب البيت هو المهندس المعماري عمر الفاروق، اللي بناه خلال 21 سنة، وأطلق عليه اسم “الحلم المعماري”.
بيت تريزة في دهب
شوفنا المكان ده في الحلقة 21 من المسلسل. بيت تريزة هو واحد من أقدم البيوت في دهب، اللي بيوفر أماكن للسكن والإقامة واتسمى بيت تريزة على اسم صاحبة المكان اللي قررت تبنيه وتستقر فيه من زمان، وبعد وفاتها، اتجدد المكان وبقى بيستقبل الزوار والسياح. البيت مبني من مواد طبيعية وبيشوف البحر من كل مكان، ده غير الديكورات والقاعدات المريحة هناك.