في رمضان السنة دي، المسلسلات طبعًا ماتخلاش من العلاقات بمختلف أنواعها، سواء علاقات تخليك تبغى الارتباط وأنت ما تبغاه يا أخي، أو علاقات تعقدك في عيشتك وتكرهك في الجنس الآخر من أساسه، والنماذج السنة دي بتأدي دورها بمنتهى الإتقان فعلًا، علشان كده حابين نشوف معاكم كابلز في مسلسلات رمضان ونحلل علاقاتهم ونشوف عايزين نبقى زيهم ولا عايزين نبقى سنجل باقي حياتنا.
الكبير ومربوحة – الكبير 6
جولز في المزاريطة؟ الحقيقة ناس كتير على السوشيال ميديا بيتغزلوا في علاقة الكبير ومربوحة مراته الجديدة رغم إن جوازتهم ماعداش عليها أربع خمس حلقات، لكن علاقتهم فيها حاجات كتير كويسة، من ضحك وأطقم غريبة، لتضحية بالنفس من أجل الطرف التاني.
تونة وسيف – فاتن أمل حربي
وعلشان الدنيا مش نماذج كويسة بس، لازم يطلعلنا couple في رمضان ينكد علينا عيشتنا ويخلينا نصرف نظر خالص عن فكرة الارتباط، الجايزة دي السنة دي تروح بجدارة لعلاقة تونة وسيف في مسلسل “فاتن أمل حربي”. العلاقة وصلت للطلاق والمحاكم وسرقة عفش وخناق على حضانة الأطفال، أما علاقتهم قبل الطلاق حدث ولا حرج، خناقات على كل كبيرة وصغيرة بتوصل إن سيف بيمد إيده عليها كمان. دي علاقة توكسيك، لا تكن مثل سيف.
ولاء وطارق – راجعين يا هوى
وبرضه علشان الدنيا مش كلها سواد وناس بتقطع بعض وجوازات بتوصل للمحاكم، بنشوف السنة دي نموذج إيجابي حلو في علاقة لسه فيها تكهنات كده، بس يعني إن شاء الله تكمل ويرتبطوا، وهي علاقة ولاء وطارق في “راجعين يا هوى”. بس للأسف علشان الحلو مابيكملش، ولاء وطارق عيلتهم مش طايقين بعض؛ ولاد عم وحرفيًا بانيين سور بينهم في القصر، لكن لو على الـ couple نفسه لوحدهم، فهما علاقتهم لذيذة وشكلها هتتطور. احنا مستنيين بقى نشوف هيبقوا كويسين ولا علاقة أهلهم هتأثر على علاقتهم.
ليلى وآدم – سوتس بالعربي
علاقة شكلها كده هتتحول من الغلاسة اللي احنا شايفينها دلوقتي دي، لحاجة لذيذة وhealthy relationship، وده لو حصل، الفضل هيرجع لآدم وكلامه الحلو اللي هيغير ليلى من ناحيته خالص، من الرخامة بتاعتها في الشغل لعلاقة حلوة. خلينا نشوف في الحلقات الجاية، بس عمومًا كنصيحة، ماتبقيش زي ليلى.
ورد وماهر – المشوار
باين من الصورة صح؟ علاقة كويسة حتى وسط الصعاب والمخاطر طبعًا اللي بيعيشوها ومتعودين نشوفها من محمد رمضان، لكن رغم اللي بيمروا بيه من هروب وتجارة الآثار، علاقتهم ببعض كويسة. وده يعلمنا حاجة، مهما كانت الظروف اللي بنمر بيها ومهما كانت حياتنا بايظة، نحافظ على شريك حياتنا وعلى علاقتنا بيه إنها تكون مريحة.
لُقا وتوبة – توبة
قصة حب بين النيران فعلًا، شدّنا مشهد طلاق توبة لمراته، في وسط الشارع، وهو بيطلقها بجُمل سيريالية جميلة وبيقولها إنتي طالق يا أغلى حاجة في عمري، مابقيناش فاهمين إيه العلاقة دي، لكن الموضوع ضمن الأحداث منطقي شوية، وهو إنه اضطر يطلقها بطلب من والدها، بعد ما أهل منطقته رفضوه ورفضوا توبته ومحاولاته إنه يعيش حياة طبيعية بعد ما اتعاقب على جرايم عملها في الماضي، وطلع عليه إشاعات الله أعلم بحقيقتها؛ إنه رجع للسرقة والبلطجة اللي تاب عنهم وعامل مشاكل، وبييجي البوليس يقبض عليه في وسط مشهد الطلاق. هنسيبكم مع لقطة من المشهد اللي مش مفهوم ده، وأنتوا قرروا العلاقة دي كويسة ولا لأ.