بتدور تتفرج على إيه؟ ده ملخص الأسبوع الأول من مسلسلات رمضان

لو مش عايز يتحرقلك الأحداث، يبقى المقال ده مش ليك، احنا حاطين SPOILER ALERT أهو بالبُنط العريض. علشان احنا في أول أسبوع في رمضان وكله ملخبط ومش عارف لسه يتفرج على إيه؛ إيه المسلسلات اللي الناس بتقول إنها حلوة ولازم نشوفها ماينفعش نفوتها، إيه المسلسلات اللي خيبت ظنهم، إيه اللي بدأوا بداية قوية وشدّوا الجمهور، إيه فكرته خفيفة ولذيذة، وإيه تقيل وبيناقش قضايا مهمة. هنقولك اللي حصل وملخص مسلسلات رمضان لحد الحلقة الرابعة، وأنا، نيره، هقولك رأيي في المسلسلات، وأنت تقرر عايز تتابع إيه بعد ما تعرف كمان اللي فايتك بدل ما تضيع وقت في إنك تدور وتشوف الحلقات اللي فاتت.

فاتن أمل حربي

عن: فيسبوك

دراما مجتمعية بتناقش قضايا مهمة بتواجها ستات مصرية كتير، مشاكل أسرية وعنف وطلاق، ومشاكل يمكن كلنا سمعنا عنها للأسف في معظم الأسر؛ وعلشان كده المشاهدين تفاعلوا معه وحسوا إنه واقعي بشكل كبير، وبيتوقعوا إنه يعمل تغيير حقيقي في ثغرات قانون الأحوال الشخصية، اللي للأسف أزواج كتير بيستغلوها علشان يضغطوا على الزوجة في قضايا الطلاق والمشاكل الزوجية. لو أنت بتحب تتابع المسلسلات الواقعية واللي بتناقش قضايا وبتعمل تغيير مجتمعي، بننصحك تتفرج على “فاتن أمل حربي”.

في الحلقة الأولى، بتبان خلافات فاتن وجوزها سيف، اللي بتوصلهم للطلاق. وفي الحلقة التانية، بتتصدم فاتن بإن طليقها أخد عفش البيت كله وساب الشقة على الأرض، والبواب أكدلها إنه شاف سيف بينقل العفش على عربية، وقال إنه مستعد يروح يشهد باللي شافه في القسم لما تروح تعمل محضر سرقة منقولات. وفي مشهد صعب، بتبات فاتن وبناتها الاتنين على الأرض في الشقة. وفي الحلقة التالتة، بيحصل فلاش باك لخناقة من خناقات فاتن وسيف على حاجة تافهة جدًا بتبين إنه بخيل وبيستخسر الأكل في بناته، وبيبان من كلامهم إنه بيفضّل دايمًا والدته على مصلحة بيته وبناته، وإن فاتن بتصرف كل مرتبها على البيت. وبتتطور الخناقة لإن سيف بيمد إيده على فاتن، ويتضح إن دي مش أول مرة. وفي الحلقة الرابعة، حصلت حاجة لطيفة معظم الناس ماعندهاش علم بها، وهي وجود مجمع الخدمات المتكاملة اللي بيستضيف الستات اللي بتتعرض للعنف وبيحميهم.

والحلقة الرابعة كانت السبب في إن الناس تعرف أكتر عن الأماكن اللي بتحمي الستات المعنفات وبتستضيفهم، وصفحة speak up عملت قائمة ببعض الأماكن تقدروا تشوفوها من هنا.

الكبير 6

في الحلقة الأولى من عودة الكبير في الجزء السادس، ظهرت معاناته كـ single dad بيربي أولاده التوأم من غير هدية أمهم لإنها في مصحة نفسية، وبيظهر جوني بتغيير كبير في شكله وهو مكتئب وحابس نفسه في أوضته ومش بيعمل حاجة غير إنه ياكل. وفي الحلقة التانية، بتحصل مفاجأة بتحول ابن الكبير من طفل لشاب بعد ما شرب لبن، وبعد لف كتير بيكتشفوا إن اللبن ده طفرة علمية. أما الحلقة التالتة مفاجأتها كانت ظهور عمة الكبير، اللي قامت بدورها سما إبراهيم، وبتفرض عليه يتجوز علشان تقلل من عليه مسئوليات الأطفال ويتفرغ للعمودية. وفي الحلقة الرابعة، الكبير بيتجوز “مربوحة” حتى مع رفض أولاده لها ومحاولاتهم إنهم يبوظوا الجوازة.

المسلسل كوميديا خفيفة مع شخصيات اتعودنا عليها وحبيناها، لو أنت بتحب تتفرج على حاجة خفيفة كده على الفطار، بنرشحلك “الكبير”.

الاختيار 3

من أهم المسلسلات في السباق الرمضاني السنة دي والكل متابعه، لكن لو أنت فاتك الحلقات الأولى، هنقولك على الملخص المفيد.

الحلقة الأولى كانت مفاجأتها ظهور شخصية الرئيس عبد الفتاح السيسي، علشان يشارك في الأحداث اللي بتحكيلنا كواليس أهم 96 ساعة في تاريخ مصر في الفترة الأخيرة، وبيجسد الفنان ياسر جلال دور الرئيس، وأكيد حتى لو أنت ماشوفتش المسلسل، أكيد شوفت انبهار الناس بتقديمه للشخصية بإتقان. وكمان إشادات الناس باختيار موفق للممثلين اللي تقريبًا شكلهم طبق الأصل من الشخصيات الحقيقية، زيّ خالد الصاوي في دور خيرت الشاطر، وعبد العزيز مخيون في دور محمد بديع مرشد الإخوان.

الحلقة الأولى شهدت تفاصيل خروج الشعب في مظاهرات ضد حكم الإخوان في ثورة 30 يونيو، وازاي خطط خيرت الشاطر ومحمد البلتاجي لأخونة جهاز الشرطة المصرية وتفكيكه من خلال ميليشيات مسلحة. أما الحلقة التانية كانت ملخصها إن خيرت الشاطر طلب من السيسي إن يكون في تعاون بين الجيش والإخوان، لكن السيسي أظهر عدم اهتمامه بالكلام وبيّن اهتمامه برجال الجيش، ومن ناحية تانية بيظهر باقي الأبطال الــ٣ الضباط؛ زكريا ومصطفى ومروان، اللي بيقوموا بمأمورياتهم المختلقة بهدف الوصول لأعضاء الجماعات التكفيرية. والحلقة التالتة كانت تحت اسم “أخونة الدولة”، وكان فيها زيارة مرشد الإخوان للفريق أول عبد الفتاح السيسي اللي أكد إن الجيش لازم يكون بعيد عن الانتماءات السياسية. وفي الحلقة الرابعة، كان الحدث الرئيسي أزمة النائب العام، وأزمة انقطاع الكهرباء ونقص الوقود وقتها، وفي اجتماع الحكومة أكد وزير الدفاع الفريق أول عبد الفتاح السيسي إن لازم نتكلم مع الشعب بوضوح ونوضح الأزمة الاقتصادية، مش مجرد نهدي غضب الناس.

سوتس بالعربي

المسلسل الأجنبي، هو هو بس بطابع مصري وشخصيات بنشوفها حوالينا في يومنا، وخناقة بين الناس اللي شافت النسخة الأجنبية منه وبتفسد على إخواتهم اللي لسه أول مرة يشوفوه في نسخته العربية. المسلسل اتحط في مقارنات كتير من أول الإعلان عن الشخصيات، وفي مقارنات بينهم وبين ممثلين النسخة الأجنبية، لكن المسلسل لحد دلوقتي ماشي كويس وبنشوف مكتب محاماة كبير بيضم أهم وأكبر محاميين في البلد، يا ترى ازاي بيتعاملوا مع القضايا بطابع مصري؟ هنعرف في الحلقات الجاية أكيد. لكن حاليًا ماسكين قضية تحرش جنسي، وبيلموا المعلومات علشان يجيبوا حق الضحية، اللي بتقوم بدورها هدى المفتي. والحقيقة المسلسل فتح المناقشة في موضوع التحرش الجنسي في أماكن العمل، وازاي الموضوع بيكون أصعب وازاي ممكن نتعامل معه ونجيب حقنا. وده اللي بنستناه من الدراما، إنها تأثر في الواقع وفي الناس بشكل إيجابي.

أحلام سعيدة

السنة دي يسرا سابت الصراعات العائلية والدراما وحبت تجي لنا بشوية كوميديا ولذاذة، عاملة دور “فريدة هانم” اللي عايشة لسه مع نفسها في زمن هوانم جاردن سيتي، وعايزة كل حاجة مظبوطة بالمللي، وبتروح مزادات تشتري حاجات غريبة بفلوس كتير. لكن بعد كده بيحصل حاجة تقلب كل ده، فريدة هانم عملت حادثة بتفقدها البصر، وبيقترحوا عليها تشارك في جلسة علاج جماعية مع ستات وكل واحدة بتتكلم عن مشاكلها وعن حياتها، وبتتعرف منها على غادة عادل ومي كساب. في الأول ماكانتش طايقاهم، بس مع الوقت بيبقوا أصحاب، ومستنيين نشوف الأحداث الجاية هتجمع بينهم ازاي.

مكتوب عليا

من الحاجات الخفيفة والكوميديا مع شوية خيال علمي وفكرة مختلفة، “مكتوب عليا” اسم على مسمى، في رحلة البطل أكرم حسني اللي بيقوم بدور مدرس موسيقى. أول حلقة كانت عبارة عن تعريف بالشخصية وحياته، وبعد كده بيبتدي يشوف كلام بيتكتب على جسمه بشكل غريب، ويدخل في دوامة الدكاترة ويحاول يعرف سبب اللي بيحصله. الغريب كمان إن كل يوم بيصحى يلاقي كلمات معينة مكتوبة على إيده، والكلمات دي بتتحقق من خلال موقف في يومه، ومجرد ما الحدث يتحقق الكلمة بتختفي من على إيده، كل ده بيحصل في إطار أحداث شخصيته وعيلته والدكتور النفسي اللي بيعالجه بالطب البديل، إيه سبب ظهور الكتابات دي وازاي مربوطة بأحداث يومية في حياته؟ مستنيين نعرف!

مين قال

مسلسل “مين قال” هو التريند على شاهد vip، وفي الحلقة الأولى شوفنا أحمد داش اللي بيلعب دور “شريف” وهو في صراع مع نفسه وعيلت. شريف هو طالب في الثانوية العامة، ويوم النتيجة، باباه، اللي بيلعب دوره الممثل جمال سليمان، قال إنه عاوزه يدخل هندسة عمارة، لكن بنشوف شريف وهو عنده اهتمامات تانية زيّ بيع منتجات على صفحته. بتتطور الأحداث وبنشوف الأب وهو بيجبر ابنه إنه يقفل الصفحة دي ويهتم بالهندسة، وبيستمر الصراع ده ما بين شريف وعيلته، الصراع الموجود في كل البيوت المصرية، لحد ما نوصل الحلقة الرابعة ويتعرض شريف لمشكلة كبيرة.. ياترى إيه اللي حصل والمشكلة دي هتتحل ازاي؟ متحمسين نعرف!

المشوار

معظم الناس متحمسة لمسلسل محمد رمضان السنة دي، وبيتكلموا عن الإخراج والتصوير فيه، ومتحمسين للقصة كمان، اللي لحد دلوقتي بتدور عن محمد رمضان ومراته دينا الشربيني، اللي بسبب ضيق الحال مضطرين يعيشوا في نفس البيت مع الخالة صفية. وفي الحلقة التانية، بتحصل مفاجأة بنعرف بيها أخيرًا إيه حكاية الشنطة اللي اتعمل عنها تريند والناس كانت مستنية تشوف إيه الحاجة المهمة اللي فيها، وطلع إن فيها آثار، واتقبض على رجل الأعمال “وجيه بيه” وتم التحفظ على الشنطة، لكنه قال إنه مايعرفش أي حاجة عنها أو عن اللي جواها، أما محمد رمضان “ماهر” وزوجته دينا الشربيني هربوا من المصنع، وده بعد ما كشف مكانهم رجال أحمد كمال اللي هو “وجيه بيه” المتهم في قضية التجارة في الآثار، وطلب وجيه من زوجته الوصول لمحمد رمضان فورًا وقدروا يعرفوا مكانه من خلال تليفون صاحبه”سعيد”. ورحلة هروب من هنا لهنا وبعدها شكوك في تورط محمد رمضان في قضية الآثار، لكن إيه علاقتهم بالشنطة؟ مستنيين نعرف، ومستنيين إنه يبقى مسلسل مختلف عن كل مسلسلات محمد رمضان في السنين اللي فاتت.

راجعين يا هوى

دراما عائلية ومشاكل على ورث وشكوك في قتل أخ، فبينزل خالد النبوي “بليغ” لمصر بعد سنين من الغربة، علشان يحل مشاكل العائلة اللي زوجات أخواته فيها بيكرهوا بعض وبيخلوا أولاد العائلة كمان مش طايقين بعض. وفي وسط كل ده، خالد النبوي بيقابل نور، وبتجمع بينهم صدفة بتخليها تمثل إنه خطيبها علشان تهرب من عريس متقدم لها. الدراما في عائلة بليغ دراما كوميدية بين السلايف في العيلة وهما وفاء عامر وأنوشكا، واللذيذ كمان إننا بنشوف في المسلسل خالد النبوي وابنه نور، والناس بتتكلم عن الأوفردوز كاريزما في المسلسل.

في بيتنا روبوت 2

من كتر هيافته هو عدى مرحلة الخفة واللذاذة والكوميديا العادية، علشان كده، لو أنت من محبين المسلسلات الخفيفة -أوي جدًا- يبقى ده المسلسل المثالي لك، وأنت بتفطر، وأنت سارح في الملكوت بعد الفطار وعايز تتفرج على قصة خفيفة ومشاهد كوميدية مش هتحتاج تشغل دماغك فيها خالص، بننصحك تشوف في “بيتنا روبوت 2”. ببساطة، المسلسل بيدور عن نفس العيلة اللي شوفناها في الجزء الأول، هشام جمال وزوجته في المسلسل ليلى زاهر، والروبوت اللذيذ اللي بيقوم بدوره عمرو وهبة، والروبوت زومبا اللي بتقوم بدورها شيماء سيف، في أحداث كوميدية ظريفة خفيفة عايزين نعرف المغزى من وراها إيه.

يوتيرن

غيرة بين الصحاب ومين بيوقع بين مين ومين نفسها تخرب بيت صاحبتها، دايرة من عدم السلكان بتسيطر على مسلسل يوتيرن والشر كله طالع لحد دلوقتي من نانسي صلاح، أما ريهام حجاج ظهرت في أول المسلسل بلبس ظابط ملاحة مع كريم قاسم زميلها اللي بتربطهم علاقة قوية خصوصًا إنهم كمان قرايب، إيه اللي هيحصل ونهاية التوقيع بين الناس ده وعدم السلكان إيه؟ لو مهتم اتفرج واعرف.

ملف سري

المسلسل بيركز على قاضي معروف عنه النزاهة والعدالة، وإنه بيواجه الفساد، لكنه بيتعرض لابتزاز من عيلة “المالكي” ودي عيلة رجل أعمال مهم، علشان مصلحة في قضية تخص تعاملات غير قانونية لرجل الأعمال> وطبعًا القاضي بيرفض كل محاولات المالكي، لحد ما خطيبته بيتم إدخالها في صراعهم وبتختفي قبل المحاكمة.

مستنيين نعرف باقي الأحداث، ولو أنت بتحب النوع ده من الدراما، هيعجبك أداء الممثلين اللي الجمهور فعلًا بيشيد بيهم.

آخر كلمة: ماتفوتوش قراءة: في رمضان: ازاي حرق المسلسلات على السوشيال ميديا بيفقدنا متعة المشاهدة

تعليقات
Loading...