في الأعمال الدرامية، لازم بيكون في شخصية اللي بتلعب دور الأم.. ولكن في ممثلات قدروا يتميزوا في الدور ده بالذات، ويخلوا الجمهور يحس إنهم مش بس أمهات لشخصيات المسلسل، ولكن لينا كلنا.. وفي يوم عيد الأم، حبينا نتكلم عن الممثلات اللي قدروا يعملوا أدوار الأم ببراعة تقديرًا ليهم ولموهبتهم.
كريمة مختار
إزاي نتكلم عن الفنانات اللي قدموا أدوار الأم وماتكونش الفنانة العظيمة كريمة مختار أو “ماما نونا” أول واحدة في القائمة؟ بدون شك، تجسيدها لدور ماما نونا خلانا نشوف كل صفات الأم الجميلة اللي بتدلع ابنها وبتحبه، ومن كتر نجاحها في الدور ده، بقى في محل باسم ماما نونا وألعاب على شكلها.. بقت مثال الأمومة!
ماجدة زكي
ماجدة زكي من الفنانات اللي بتقدر تأدي كل وأي دور ببراعة.. بس أدوارها كـ “أم” واللي كان من أبرزها في مسلسل عائلة الحج متولي وعباس الأبيض في اليوم الأسود، قدرت تنقلها لمنطقة تانية خالص، فكلنا بنحبها وبنحس ناحيتها بمشاعر جميلة لإننا لسه متأثرين بأدوارها.. وعمرنا ما هنسامح الحج متولي لما قالها إن سعيد مش ابنها!
عبلة كامل
مين فينا يقدر ينسى أدوار عبلة كامل الكتيرة والعظيمة كأم في أعمالها السينمائية والدرامية وأشهرهم مسلسل لن أعيش في جلباب أبي.. عبلة كامل بخفة دمها وعفويتها وكمان طبيعتها قدرت تجسد شخصيات الأم والزوجة المصرية الأصيلة بطريقتها الخاصة اللي كلنا بنقدر نـ relate ليها!
رجاء الجداوي
الفنانة الراحلة الكبيرة رجاء الجداوي قدرت تسيب بصمتها في دور الأم، اللي كانت بتلعبه أحيانًا كـ “أم” قاسية وأحيان تانية كأطيب أم في الوجود، ولكن في النهاية هي سابتلنا أدوار رائعة وصورة ذهنية عن شكل وطبيعة الأم المصرية بتبقى عاملة إزاي.
دلال عبد العزيز
دلال عبد العزيز بتفكرنا بأمهاتنا الطيبين اللي ممكن يزعقوا شوية ولكن في الأخر بترجع تاني للدلع علشان هي بتحب أولادها جدًا، وشوفنا ده في فيلم لا تراجع ولا استسلام لما بيعها حزلقوم دهبها علشان يسافر بلطيم في الآخر! ولكن في النهاية ماقدرتش تزعل منه وكل اللي فرق معاها إنه جيه بالسلامة.. mother goals ولا إيه؟
سوسن بدر
الفنانة القديرة سوسن بدر من الفنانات اللي قدمت أدوار كتير أوي كـ “أم” زيّ الدالي وعايزة اتجوز لحد مسلسل مسك.. والحقيقة إنها بتقدر وببراعة إنها تقدم نماذج الأم بأشكال مختلفة وبنقتنع بيهم كلهم!
فردوس عبد الحميد
شوفنا الفنانة فردوس عبد الحميد في مسلسل أدهم وزينات و3 بنات وهي بتقدم دور الزوجة والأم اللي بالنسبة لها بيتها وعائلتها أهم حاجة في حياتها، على أكمل وجه!
هالة فاخر
شوفنا الفنانة هالة فاخر في أدوار كتير في أعمالها الدرامية والسينمائية وهي بتجسد دور الأم سواء اللي بتشقى وبتتعب علشان تعرف تربي أولادها أو الأم اللي بتدلع ولادها زيادة عن اللزوم، لكن في النهاية حبيناها في كل أدوارها وتجسيدتها لشخصية الأم!