البحث عن علا: ليه بعد 11 سنة لسه متحمسين للجزء التاني من “عايزة أتجوز”؟

ممكن تتصدموا زيّ ما إحنا اتصدمنا إن المسلسل اللي كتير مننا بيحبوا “عايزة أتجوز” تم عرضه سنة 2010، وده معناه إن إحنا كنا بنقعد قدام التلفزيون نتابع أحداث عيلة عبد الصبور وخناقات “سهير” والدة علا مع حماتها، من أكتر من 10 سنين! بعد إشاعات كتير سمعناها عن عمل جزء جديد ولا لأ، ولكل اللي كان بيتابع المسلسل ومستني يعرف علا راحت فين بعد ما هرب العريس من فرحهم في آخر حلقة، دلوقتي بس هتقدر تعرف إيه اللي حصل!

نشرت الفنانة هند صبري على حسابها بانستجرام فيديو وهي بتأكد إن الجزء التاني من مسلسل عايزة أتجوز بيتم تحضيره وهيبقى باسم “البحث عن علا”، وكان باين من الفيديو إن هند صبري كانت في اللوكيشن لإن ظهرت معاها في الفيديو الفنانة القديرة سوسن بدر.. وكمان ظهر في الخلفية مخرج العمل هادي الباجوري والفنانة ندى موسى والفنان محمود الليثي، اللي من الواضح إنهم هيظهروا كشخصيات جديدة في المسلسل.. فعلًا الطاقة الإيجابية اللي جاتلنا من الفيديو لوحده كانت غير طبيعية.. طب هنحس بإيه لما نشوف علا وأخوها حازم والأم والأب سهير وعبدالصبور، بعد ما عدى أكتر من 10 سنين عليهم! ومن المنتظر إن المسلسل يتعرض قريب على منصة نتفليكس.. في أحلى من كده؟ بصراحة مفيش وعلشان كده فكرنا، إيه اللي إحنا هنكون متشوقين إن إحنا نعرفه؟

علا راحت فين؟

بديهي صح؟ ده حتى المسلسل اسمه مشتق من الفكرة دي. بس بجد، هل بعد كل الـ hassle دي، علا اتجوزت في الآخر؟ هل لسه بتشتغل كصيدلانية ولا سابت الشغل أو حتى عملت كرير شيفت؟ وهل بعد كل السنين دي، ممكن تبقى لسه قاعدة في البيت مع مامتها وباباها؟

مين الشخصيات اللي هتكمل من الجزء الأول؟

كان في شخصيات كتير سواء محورية أو لأ، حابين نشوف هما هيكملوا في الجزء الجديد ولا مش هيكون ليهم وجود، ولو فعلًا مشيوا، أصحاب العمل هيبرروا عدم وجودهم إزاي من خلال أحداث المسلسل؟ يعني مثلًا إحنا مشوفناش في الفيديو طارق الأبياري (أخو علا) ولا الفنان أحمد فؤاد سليم (الأب)، فهل مش هيكونوا موجودين، ولا هيتبدلوا بأبطال تانية؟ ورجاء حسين هتكون فين، هل هتفضل موجودة وهنشوف خناقات جديدة بينها وبين سوسن بدر، ولا هنتحرم من الموضوع ده علشان مش ضمن الأحداث؟ شخصيات زيّ نهى (كارولين خليل) صاحبة علا في الجامعة والشغل من بعض وحتى شخصية مدام سندس.. راحوا فين؟

إيه التطورات اللي هنشوفها في شخصياتهم؟

طيب لنفترض إن كل الشخصيات الأصلية مكملة في المسلسل، يا ترى إيه التغيرات عليهم وإيه أسبابها؟ هل هتفضل سوسن بدر بتزن على بنتها إنها تشد حيلها وتتجوز حتى بعد 11 سنة لو علا ماكنتش اتجوزت؟ هل هيفضل حازم أخوها تافه ولا هيكبر ويعقل؟ هل مدام سندس هتفضل تدعي على جوزها مرسي، ولا هيكون مات فعلًا من دعواتها عليه؟

هل هيشارك ضيوف شرف كتير في المسلسل زيّ الجزء الأول؟

لإن المسلسل قايم على فكرة البحث عن عريس، فتقريبًا كل حلقة كان بيكون في ضيوف شرف من النجوم الكبار زيّ أحمد السقا وعمرو يوسف وإدوارد وتامر هجرس وغيرهم كتير، وبصراحة ده كان أحد أسباب نجاح المسلسل، لتنوعه والنجوم الكبار اللي بيشاركوا فيه، فهل ده هيستمر في الجزء التاني… ولا علا اتجوزت خلاص؟

آخر كلمة: هل ناويين تتابعوا وتشوفوا علا راحت فين بعد 11 سنة من الغياب؟

تعليقات
Loading...