علشان تساعد الناس، دايمًا أي موقف قدامك مهما كان بسيط بيخلي دماغك تشتغل في إن إزاي تعرف تسهل على الناس حياتهم اليومية واللي بيواجههم كل يوم؟ وبفكرة جديدة، قررت شيماء النجار إنها تساعد المرضى بعد العمليات الجراحية والكسور اللي تعرضولها أو اللي بيواجهوا صعوبة في الحركة لأي سبب، بحاجة هتسهل عليهم كتير من معاناة يمكن ماكنتش تيجي في بال أي حد، وهي أبسط حاجة، إنهم يقوموا بتغيير ملابسهم، وقررت تعمل Adapt Garment أول براند مصري متخصص في صناعة لبس مصنوع بتصميمات تناسب المرضى وتسهل عليهم المعاناة دي، لبس مريح وفي نفس الوقت شيك، تعالوا نشوف إزاي.
من لبس مصمم مخصوص للغسيل الكلوي وجراحات الكتف وكمان جلسات العلاج الكيميائية، بشكل يسمح بالعملية دي بسهولة من غير ما يضطر المريض لإنه يغير لبسه زي الصور دي كده، بسويت شيرت مصمم بسوستة تتفتح من فوق لحد آخر الدراع، علشان تسهل العمليات دي للمريض.
وبنطلون جراحة مفتوح من الجنبين مناسب لمعظم جراحات أسفل الجسم وموجود فيه كمان جيب علشان يتشال في الدرنقة.
وكمان شورت بجيب جانبي علشان القسطرة.
حتى المشكلة اللي بتواجه الأمهات في الرضاعة برا البيت، لقوا ليها حل بتصميمات كتير كمان مختلفة وشيك، كلها بتسهل للأم رضاعة طفلها في أي مكان.
