حدث آثري وسياحي حقق نجاح كبير عالميًا، وأثر إيجابيًا على نواحي مختلفة في مصر، اقتصاديًا وتاريخيًا وسياحيًا، احتفالية طريق الكباش اللي بيربط بين معبد الأقصر ومعبد الكرنك، اللي يعتبروا من أهم المعابد في العالم وبيضم آثار فريدة من نوعها، غير إن الأقصر نفسها بتضم حوالي ثلث آثار العالم زيّ ما اتعلمناها من صغرنا، لكن كمان الأهمية مش بتتقاس بالكم، لكن بأهمية الآثار نفسها اللي بتدل على حضارة من آلاف السنين.
الدكتور خالد العناني وزير السياحة أعلنت إمبارح في اجتماع مجلس إدارة الهيئة المصرية العامة للتنشيط السياحي، إن فعالية “الأقصر.. طريق الكباش” هيتم تنظيمها كل سنة، وبكده هتكون أول فعالية سنوية يتم إقامتها بشكل منتظم، وهيتم الإعلان عنها قبلها بوقت كافي، وكمان هيتم بحث إمكانية حضور السائحين فيها والتجول بطريق المواكب الملكية. وده في إطار استراتيجية الوزارة لتنظيم أحداث وفعاليات سياحية متنوعة على مدار السنة.
احتفالية افتتاح طريق الكباش تمت على مستوى كبير، وضمت أفلام قصيرة عن الأقصر، وأغاني ساهمت في نجاح الاحتفال بشكل مبهر، غناها فنانين مميزين منهم محمد حماقي ولارا اسكندر، وائل الفشني، ده غير شرح وزير السياحة الدكتور خالد عناني عن تاريخ طريق الكباش والأقصر، وعن اللي تم تنفيذه من عمليات تطوير وترميم فيه على مدار سنين، كل ده بطريقة شرح مبسطة وممتعة نالت إعجاب الناس بعدها وخلتهم متحمسين يعرفوا أكتر عن تاريخهم.