بعد اللي حققه موكب المومياوات الملكية، العالم بيستنى من مصر إنه يعرف أكتر عن تاريخنا وآثارنا بشكل يشد الانتباه زيّ اللي حصل في الموكب الملكي اللي نقل 22 مومياء ملكية من المتحف المصري في التحرير لمتحف الحضارة في الفسطاط، وشهد على الاحتفالية العظيمة دي العالم كله، ده بيخلينا صعب نعدي احتفال آثري بشكل عادي، وفي نفس الوقت بيدينا فرصة إننا نعرّف العالم كله تاريخنا بشكل مميز وباحتفالات عظيمة.
بعد أكتر من 70 سنة من التعثر بسبب حجم التعديات على الطريق، مصر بتستعد لوضع اللمسات الأخيرة للاحتفالية العالمية اللي هتنفذها وزارة السياحة المصرية، لافتتاح المشروع القومي لإحياء طريق الكباش في الأقصر، اللي تعتبر أهم مدينة آثرية في مصر، وكمان بالنسبة للعالم كله، علشان كده، دي فرصة كبيرة لجذب السياحة والترويج ليها.
“عايزين نعمل شغل جديد وهنوري العالم الأقصر كمنتجع سياحي متكامل، وهو حدث ترويجي للسياحة، وهو حدث سياحي نقول فيه للعالم تعالوا شوفوا مصر والعالم متوقع للافتتاح” وزير السياحة والآثار صرح بالكلام ده أثناء مداخلة في برنامج حديث القاهرة، مع مجهود وزارة السياحة في التحضير للحدث ده، وإطلاق فيديو ترويجي.
#الأقصر_قريبا
#LuxorsoonPosted by Ministry of Tourism and Antiquities وزارة السياحة والآثار on Thursday, November 4, 2021
الموعد الرسمي للافتتاح لسه ماتحددش، لكن وزير السياحة أعلن إنه هيكون قريب. طريق الكباش بدأ العمل فيه من حوالي 18 سنة لكنه توقف لسنين طويلة وتم الاستئناف، والطريق ده بيربط معبد الأقصر بمعبد الكرنك، وطبعًا أهمية المعبدين مش محتاجين نتكلم عنها، علشان كده مستنيين احتفال قوي بحدث تاريخي مهم.