توثيقًا لموكب المومياوات الملكية: إصدار عملات تذكارية بشعار الاحتفالية

حدث عظيم شهده العالم كله بتخلد فيه مصر تاريخ عظمائها، موكب المومياوات الملكية حدث مايتنسيش، وعلشان كده مصر أصدرت عملات تذكارية فضة من فئة 100 جنيه بشعار احتفالية موكب نقل المومياوات من المتحف المصري بالتحرير لمتحف الحضارة في الفسطاط، وكمان هيتم إصدار عملات معدنية قابلة للتداول من فئة الجنيه والـ 50 قرش بنفس التصميم.

توثيق عظيم بيحصل للأحداث المهمة والاستثنائية اللي بتمر بيها مصر، والعملة بتحمل الشعار باللغة العربية والإنجليزية.

تعالوا نشوف التصميم وأهم الأحداث اللي تم توثيقها على العملة المصرية.

الموكب الملكي شهد نقل 22 من المومياوات الملكية لملوك وملكات الأسرة الـ17 ولحد الأسرة الـ22، منهم مومياء حتشبسوت وسقنن رع وتحتمس التاني وسيتي الأول.

تمت عملية النقل بموكب عظيم يليق بالملوك والملكات، وتم التحضير له على مدار شهور بتقنيات وتجهيزات من أحفاد مايقلوش عظمة عن أجدادهم.

فكرة صك عملات تذكارية لتخليد ذكرى أحداث تاريخية هو عادة مصرية متوارثة على مر العصور. عندنا عملات تذكارية من أقدم نقاط في التاريخ المصري بتؤرخ لإنجازات كتير، منها إنجازات في عهد محمد علي، لحد النهارده، زيّ إنشاء القناطر الخيرية وخزان أسوان والسد العالي اللي كتير من أهلنا محتفظين بالعملة التذكارية له وشوفناها معاهم، كمان العملة التذكارية لتخليد تأميم قناة السويس، وإنشاء قناة السويس الجديدة، ومدينة الجلالة، وغيرها من الأحداث التاريخية.

آخر كلمة: ماتفوتوش قراءة: كل اللي محتاج تعرفه عن موكب نقل المومياوات الملكية

تعليقات
Loading...