الثانوية العامة تعتبر قضية كبيرة في مجتمعنا من سنين كتير، رغم كل المحاولات من كل الأطراف لتسهيل عملية الدراسة والامتحانات وتسهيل كل الطرق علشان تكون سنة عادية ونمحي رهبة الطلاب وأهلهم والمجتمع كله من مجرد سنة دراسية، لكن مع ذلك للأسف لسه بنلاقي مشاكل بتواجه الطلبة. والسنة دي، الطلبة اشتكوا من التفتيش الذاتي وحسوا إنه بيتم بطريقة فيها إهانة، والبعض قال إنها عبارة عن “تحرش”، واتواصلوا مع صفحة speak up اللي نشرت المشكلة.
الطلبة بعد كده اتواصلوا مع وزارة التربية والتعليم بتقديم الشكوى بتاعتهم من خلال الرقم المخصص والإيميل للوزارة، وبالفعل تمت الاستجابة لشكوتهم بسرعة، واتضح عدم قانونية التفتيش الذاتي وإنه التفتيش قبل الدخول للجان الامتحان المفروض يتم باستخدام العصا الإلكترونية فقط بدون لمس الطلاب.
صفحة speak up ساهمت بشكل كبير وفعّال في نشر قضايا كتير علشان نوصل لحلول لها، لكل اللي بيتعرضوا للعنف بكل أشكاله سواء نفسي أو جسدي، وللناجيات من التحرش والاغتصاب، وساهمت في إن المجتمع يعرف أكتر عن القضايا دي، وكتير منها تم التدخل قانونيًا للوصول لحل. لكل الطلبة في ثانوية عامة أو أي مرحلة، لو اتعرضتم للموقف ده، تواصلوا مع الوزارة وهيتم حل مشكلتكم في أسرع وقت.