بعد القبض عليه: نهاية ترند “عامل النظافة”

بقالنا فترة لازم كل يوم تقريبًا نسمع أخبار عن عامل النضافة صاحب واقعة كشري التحرير.. راح فين.. حد عرض عليه شغل.. راح عزاء شخصية مشهورة.. خطب مذيعة.. عمل أغنية مع ابن شعبان عبد الرحيم، وناس كتير عمومًا بيعلقوا على الموضوع وعلى أخباره اللي بقت جزء من حياتنا اليومية، والمناقشات ومين مع ومين ضد، لكن دلوقتي انتشر خبر كان هو الفرقعة والمفاجأة، إن عامل النظافة اتقبض عليه وطلع إنه كان صادر ضده أحكام قضائية.

“ألقت مباحث الجيزة القبض على عامل النظافة محمد عادل، المعروف إعلاميًا ببطل واقعة كشري التحرير، لتنفيذ أحكام قضائية صادرة ضده خلال السنوات الأخيرة” ده بالظبط اللي انتشر في الأخبار، واتقال إن صاحب الواقعة صدر بحقه أحكام غير نهائية بتهمة قتل خطأ في حادث في منقطة القاهرة الجديدة، ده غير حكم تبديد، واتنقل عامل النظافة المتهم لقسم شرطة أبو النمرس ومنه لمحكمة القاهرة.

لو مش عارف الموضوع، تعالى نحكيلك باختصار من الأول.

الطرد من محل كشري

الموضوع ابتدا لما حصل واقعة في محل كشري دخله عامل النظافة علشان يطلب أكل زي أي حد، لكن شخص من اللي بيشتغلوا في المحل قاله يستنى برا وهما هيجيبوا له الأكل اللي طلبه، اتطرد محمد عادل من المحل بسبب لبسه، ووقتها الدنيا قامت على العنصرية اللي حصلت وازاي الموقف ده يحصل.

الفكرة إن الموضوع تطور عن مجرد واقعة حصلت واتعرفت وكان في رد فعل، وفي النهاية العامل أخد حقه واترد له اعتباره بطرق كتير، والناس كلها قالت له إنهم بيدعموه وعلى السوشيال ميديا الناس أشادت به، وفنانين كتير قابلوه وعرضوا عليه شغل كمان.

من واقعة لترند يومي

بشكل ما، الحكاية اتحولت من مجرد واقعة أو ترند زي ما بنقول وبيروح لحاله بعد يومين، لترند يومي، أخبار محمد عادل بقت تنتشر حتى لو بيتنفس عادي! شوفنا أخبار عنه لما راح عزاء المحامي المعروف فريد الديب، وعن تحضيراته مع ابن الفنان شعبان عبد الرحيم لأغنية على نهج شعبان عبد الرحيم، والترندات دخلت في بعض لما شوفنا كواليس تسجيل الأغنية وبيغني فيها عامل النظافة، ومعاه “ويجز الغلابة” صاحب الترند اللي قبله على طول “أنتش وأجري” بأغنية مايكل جاكسون اللي بقت “أتاتا إيتي مونتو”.

وبشكل عام، أي حد عايز يتشهر أو “يركب الترند” زي ما بيتقال، بيتلزق في عامل النضافة بأي شكل، لدرجة إننا سمعنا عن خبر خطوبته على مذيعة مغمورة واتصوروا بالدبل على الهواء في قناة غير معلومة.

ترند زاد عن حده وقلب لضده

في ناس شافت إن الموضوع بقى بايخ، والترند مدته زادت وبقى محمد عادل ناقص ينزل لنا من الحنفية زي ما الأمثال الشعبية بتقول، وإنه استغل الواقعة اللي حصلت له بالصدفة في إنه يبقى نجم مجتمع، وأخباره بقت في كل حتة، وبيقصد يعمل حاجات مثيرة للجدل علشان يفضل ترند، وكمان اللي اتبنوا وجهة النظر دي قالوا إن الصحافة والمواقع لهم دور كبير في اللي حصل ده لإنهم كمان بيستغلوه علشان يحققوا مشاهدات وتفاعل على السوشيال ميديا، وبيشهروه علشان مصلحتهم.

حد يلاقي دلع ومايتدلعش

في وجهة نظر تانية، ناس بتقول إن الدنيا بقت صعبة، وطبيعي لو حد جاله فرصة يبقى مشهور ويستغل ده لصالحه، أكيد مش هيتردد في إنه يستغل ده لنفسه وحياته تبقى أحسن، وأي حد مكان محمد عادل كان هيعمل كده، ماحدش هتجيله فرصة ويقول لها لأ، وبرضه ماحدش يلاقي دلع ومايتدلعش.

عامل بسيط، فرصة إنه يكون شخصية مشهورة في المجتمع شبه معدومة، بس حصل وبقى فعلًا الناس كلها عارفاه وعارفة قصته، حاول يستغل حاجات كتير علشان يفضل ترند ومعروف لأطول مدة ممكنة، علشان برضه دلوقتي الترندات بقت كتير، وأي حد في ترند بيتعرف يومين وبعدين الناس تنساه، محمد بيحاول على قد ما يقدر يفضل معروف مش منسي زي ما عاش عمره كله.

آخر كلمة: ماتفوتوش قراءة: القصة الكاملة لطرد عامل نظافة من مطعم كشري شهير