خروجات دبي: كل اللي محتاج تعرفه علشان تقضي وقت مايتنسيش مع العيلة

دبي مدينة ساحرة، فيها خروجة جميلة في كل شبر، وأسهل حاجة فيها إنك تتفسح وتنبسط، لكن في رحلتنا لدبي كنا مجموعة كبيرة من مختلف الأعمار وطبعًا كنا مش متفقين على طول الخط على الحاجات اللي عايزين نعملها، وفي خروجات كتير ناس انبسطت فيها جدًا وناس مانبسطتش خالص.

وعلشان حسيت إن المجموعة اللي خارج معاهم عاملين شبه العائلات في الخروجات، قررت أجمع الخروجات اللي كل الناس انبسطت فيها وأحطهالكم في المقال ده، علشان تعرفوا تخرجوا فين في دبي لو خارجين كعيلة.

سكاي فيو: دفعة أدرينالين محتاجة قلب جامد

في فندق “العنوان -Address” تقدر تاخد العيلة وتطلع في أسانسير زجاج “The Observatory” للدور الـ 52، وتشوف دبي من السما وتحس إنك طاير في الجو.

ولما توصل الدور الـ 52 ممكن تجرب تمشي على طريق من الزجاج أو تتزحلق على زحليقة زجاج “Glass Slide” وتشوف داون تاون دبي بالكامل من فوق، تجربة محتاجة قلب جامد بس ممتعة جدًا.

ولو عايز حاجة أجمد، تقدر تجرب المشي على حافة البرج “Edge Walk” هتلبس اللبس المخصص للتجربة وتتربط بحبال وتطلع على حافة البرج مع مختصين عن الأمان، علشان تتفرج على دبي من فوق من غير أي حاجز، وتقدر تعمل حركات وتنبسط.

توبجولف: رياضة خفيفة ومسلية لكل العيلة

في قلب دبي هتلاقي مدينة الجولف، وهناك في دبي توبجولف، ودي لعبة جولف مختلفة عن أي جولف لعبته في حياتك.

بخدمة خمس نجوم هتقعد في مكان عالي وتحتك ملعب الجولف، وكل حاجة أوتوماتيك، من أول المضارب اللي بتحركها قدام مخزن الكور علشان تطلع لك الكورة، لحد شاشات بتاخد بيانات اللاعبين علشان تحسب كل واحد لعب كام مرة وجاب كام نقطة.

تنشن بالمضرب علشان تجيب الكورة في أبعد فتحة في الملعب، وكل مرة بتلعب فيها بتشوف على شاشة قصادك مسار الكورة ووصلت لحد فين وجبت كام نقطة، ووسط العيلة والصحاب هتنبسطوا بالتحدي والإنجازات اللي هتحققوها في اللعبة.

إكسبو سيتي: مدينة المستقبل

في إكسبو سيتي، مدينة المستقبل، هتنبهر في كل خطوة باللي هتشوفه؛ من أول قاعات البلدان (قاعة مصر وقاعة الدنمارك وقاعة روسيا.. إلخ) لحد الصالات اللي بتركز على رؤية دبي للمستقبل.

واحدة من الصالات دي هي صالة ألف (صالة التنقلات) واللي بتشرح تاريخ النقل في العالم، من أول الخيول واكتشاف العجلة لحد ما نوصل للمسبارات الفضائية اللي بعتتها الإمارات للمريخ، وفي جزء من الجولة داخل صالة ألف هتقابل تلات تماثيل بطول 9 متر لعباقرة الجغرافيا والنقل في الحضارة الإسلامية؛ البكري وابن بطوطة وابن ماجد.

بعد كده رحنا وصل بلازا” ودي أكبر شاشة 360 درجة في العالم وشوفنا عرض صيد اللؤلؤ اللي بيميز شعب الإمارات، وكان عرض جميل جدًا ومبهر.

نخيل بالم فيو

طلعنا برج النخيل “ذا بالم تاور” اللي موجود في ملتقى مدينة دبي بجزيرة النخيل، علشان نشوف الجزيرة من فوق في وقت غروب الشمس، وكان المنظر جميل لدرجة إني كنت فاكر إني هبص كام دقيقة وهمشي علشان زهقت، لكن فضلت هناك أكتر من ساعة ونص.

منظر الغروب على الجزيرة الصناعية اللي معمولة على شكل نخلة من الارتفاع الشاهق ده، بيديك خليط من الاستمتاع والرهبة والسكينة والإثارة في نفس الوقت.

دبي مارينا: ذا بوينت

عند دبي مارينا ووسط مجمع تجاري كبير فيه مطاعم من مطابخ عالمية مختلفة وكافيهات، هتقدر تستمتع بغروب الشمس مع عيلتك على شاطئ البحر، وفي النفس الوقت تستمتع بألذ الأكلات من حوالين العالم.

النافورة الراقصة اللي في المارينا والخدمة الممتازة في كل مكان في المدينة، هيخليك تعيش تجربة ساحلية فخمة وجميلة.

آخر كلمة: ماتفوتوش قراءة: من زيارتنا ل “حتا” في دبي: مغامرات جديدة وسط الطبيعة الساحرة

تعليقات
Loading...