نتيجة الثانوية العامة السنة دي سببت جدل كبير، غير الجدل اللي متعودين عليه من الثانوية العامة كل سنة، المجاميع السنة دي في البداية تخض، ومش زيّ ما متعودين نشوفها بقالنا سنين والمتفوقين فوق 95% وكل الثوابت اللي في دماغنا دي، الثانوية السنة دي كانت مختلفة بشكل كبير من أول طرق الدراسة والامتحانات، فطبيعي تكون المجاميع مختلفة عن السنين اللي فاتت، تعالوا نشوف وزير التربية والتعليم فسر الاختلاف ده ازاي ووضح الفرق، لكل اللي لسه محتارين أو مش فاهمين.
الوزير صرح للأهرام بإن السنة دي، اللي جابوا 70% هما اللي جابوا 95% قبل كده، وإن نظام التعليم الجديد بيلغي ثقافة مجاميع الـ 100% وإن دفعة 2021 دفعة متميزة، وفي مؤتمر إعلان النتيجة قال: “نحتفل بتخرج دفعة لعالم أرحب من المعرفة في الجامعات” ووضح إن التطوير بدأ في الثانوية العامة من سنة 2017، لفهم أسس التعلم، وكمان الأسئلة الجديدة بتكون معيارية بحيث تقيس مستويات الفهم والتحليل، وأكد إن ده هو محور التغيير في الثانوية العامة.
أما عن التنسيق، فواضح الاختلاف الكبير في نسب القبول للمرحلة الأولى لكل الشعب، عن السنين اللي فاتت، بحيث المرحلة الأولى للتنسيق لشعبة علمي علوم السنة دي بحد أدنى 88.4% وعلمي رياضة الحد الأدنى 80%، وأدبي حد أدنى 65.7%.. وده اختلاف كبير عن السنة اللي فاتت، اللي كان فيها الحد الأدنى للمرحلة الأولى لعلمي علوم 97.60% وعلمي رياضة 94.40% وأدبي 79.90%.
بنتمنى التوفيق والنجاح والاختيار الصحيح لكل الطلاب في المرحلة الجديدة اللي داخلين عليها.