بعد أربع شهور على قصة ريهام “فتاة الغردقة المشردة”: هي فين النهارده؟

من فترة قريبة انتشرت على السوشيال ميديا قصة ريهام، البنت اللي كانت مشردة في شوارع الغردقة. البنت اللي ملامحها جميلة وشكلها بيقول إن سنها مايتعداش أوائل العشرينات. كانت بتقضي وقتها بتتمشى في شوارع الغردقة بالنهار وبتنام على أي رصيف بالليل. مش بتتكلم مع أي حد ولما حد يحاول يساعدها بترفض، ولما حد بيديها أكل بترميه، وبتدور على أكلها في صناديق الزبالة.

الناس خدت بالها من ريهام المرمية على الرصيف وبيسمعوا منها كلمات إنجليزية وإيطالية بنطق سليم، بس ماحدش كان عارف يساعدها لإنها بترفض إن أي حد يقرب منها.

وقالت ياسمين في الفيديو ده لجريدة الوطن إنها قابلتها في شوارع الغردقة وعرفت إنها محتاجة مساعدة، وحاولت تساعدها بس ريهام رفضت مساعدتها علشان في الوقت ده كانت تحت تأثير الصدمة النفسية اللي اتعرضت لها لما زوجها اللي بتحبه اختفى وجدتها اللي مربياها وبتاخد بالها منها ماتت. غياب الناس دي من حياتها سبب لها صدمة نفسية قوية أثرت على إدراكها وخلتها مش متزنة. فقررت الطالبة الجامعية في سنة تالتة تجارة، قسم الإنجليزية، جامعة عين شمس تقدم طلب لتأجيل السنة الدراسية، وبعدها بقت مشردة في شوارع الغردقة.

من خلال بوست على جروب “سكان الغردقة” نزلت ياسمين فيديو صورته لريهام، اللي رفضت تسيب الشارع وتروح معاها، وهناك قدرت تتواصل مع ناس اتعرفوا عليها ووصلوها بأهل ريهام، لكن والد ريهام رفض يستلمها وقال إنه مش مهتم بحالتها ومش عايز يعرف أي حاجة عنها.

بعد ما والد ريهام اتخلى عنها كان لازم نلاقي طريقة تانية نساعدها بيها، وعلشان كده اتواصل رواد السوشيال ميديا مع السلطات المصرية في الغردقة اللي بعتت مختصين يدوروا على ريهام في الشوارع.

ووضحت نيرمين أبوسريع، مقرر المجلس القومي للمرأة بالبحر الأحمر، إن مباحث قسم شرطة أول الغردقة استلمت البنت، واتعاملت معاها معاملة لائقة، وتم عرضها على نيابة الغردقة، وتم اتخاذ الإجراءات القانونية علشان يتم توفير دار رعاية لها، وده بالتواصل مع الجهات المختصة.

عدت أكتر من أربع شهور على حكاية ريهام: هي فين دلوقتي؟

أكد محمود وحيد مدير مؤسسة “معانا لإنقاذ إنسان”، اللي اتكفلت بالعناية بريهام إن المؤسسة استقبلت البنت، بعد ما اتكفلت بكل الإجراءات القانونية من تحرير محضر للشرطة وتوقيع الكشف الطبي عليها.

وتم نقلها للدار علشان تتلقى الرعاية الكاملة لحد ما حالتها الصحية والنفسية ما تستقر، بالذات إنها طالبة جامعية والدار كان حريص عليها وعلى مستقبلها.

وأكدت المؤسسة إن حالتها تخضع للرعاية والاهتمام من مجموعة من الاختصاصيين النفسيين في إطار خطة علاج بهدف إنها ترجع لحياتها الطبيعية وتكمل رحلة دراستها من جديد في الجامعة.

وأخر خبر في قصة ريهام لحد النهارده إن الدار قدرت تساعدها تبقى كويسة كفاية لحد ما قررت ترجع دراستها تاني، وهي دلوقتي بتحضر محاضراتها وحاسة إنها أحسن بكتير، زيّ ما وضحت الدار.

أخر كلمة: ماتفوتوش قراءة: فيلم أبو صدام.. رحلة في عقلية رجل تأكله الذكورة المسمومة