قلق كبير في العالم كله بعد ظهور متحور جديد من فيروس كورونا، والمخاوف كلها كانت من إن المتحور الجديد “أوميكرون” يكون خارج حماية اللقاحات المتوفرة حاليًا، وإنه يكون المتحور الأكثر خطورة من بداية ظهور الفيروس وكل متحوراته، لكن دلوقتي شركة فايزر الأمريكية، وشريكتها الألمانية بيونتك، أعلنوا خبر مطمئن، إن اللقاح فعّال في مواجهة المتحور أوميكرون بعد الجرعة الثالثة المعززة، والبيانات المعملية أفادت إن أخذ جرعتين فقط من اللقاح مش بيوفر حماية كافية من الإصابة بأوميكرون.
لكن في نفس الوقت، قالوا إن جرعتين من اللقاح بيوفروا حماية من الإصابة بمسار خطير من المرض، لكن أخذ جرعة تنشيطية بيزيد من مستوى الأجسام المضادة بدرجة تكفي لتحييد المتحور أوميكرون. وفي الأبحاث، الشركة استخدمت نسخة مصنعة من الفيروس، والنتائج أظهرت إن اللقاح بيتمتع بتأثير وقائي حتى مع كون الأبحاث المعملية مش بتعكس الظروف الحقيقية بشكل كامل.
الجرعة التعزيزية من اللقاح الحالي بتزود الأجسام المضادة حوالي 25 مرة، وده بيوفر مستوى مماثل للي بتوفره جرعتين ضد الفيروس الأصلي والمتحورات التانية، وده اللي أشارت إليه البيانات الأولية من الأبحاث، مع استمرار دراسة المتحور الجديد والعمل على كل الطرق اللي تخلينا نواجهه حتى لو لزم الأمر وجود لقاح جديد لمواجهته.