اليومين دول، انتشر تريند على تيك توك ناس كتير شاركت فيه بتجربتها علشان توعي ناس أكتر عن متلازمة أعراضها صعبة ومالهاش علاج، وسببها ناس كتير بتقوم به بدون وعي بخطورته، التريند ده عن متلازمة انسحاب الستيرويد الموضعي أو TSW أو التهاب الجلد الستيرودي.
المرضى نشروا تجربتهم بصورهم وبيظهر على بشرتهم تقشير للجلد، أو بشرتهم ملتهبة ومتورمة وعليها كتل! وفي منهم اللي مش قادر يتحرك، كل ده من إيه؟
الأعراض دي نتيجة رد فعل الجسم على التوقف عن استخدام كريمات ومراهم الستيرويد الموضعية، لو تم استخدامها من غير إرشادات الدكتور المعالج، وتوقفها بشكل مفاجئ أو استمرارها أكتر من المدة المطلوبة، وتعتبر كريمات الستيرويد الموضعية واحدة من أكتر الطرق المعروفة لعلاج الإكزيما وأمراض جلدية مختلفة.
الأعراض بتظهر على الجلد باحمرار والتهاب وتقشير، وبتظهر كمان في إحساس بالاكتئاب، وضعف عام في الجسم وقلة نوم، وتساقط في الشعر مع رعشة في معظم الوقت، وصعوبة في التحرك وألم شديد في المفاصل.
كل دي بتكون أعراض الانسحاب وبتفضل مكملة من شهور لسنين عشان تختفي وتروح، ومفيش علاج معين يقدر يعالجها بشكل فوري لإنه يعتبر مرض نادر.
علشان كده، لما الدكتور يوصف لك علاج ويحدد مدة معينة لاستخدامه، لازم تلتزم بيها لإن التغيير في الجرعة هيشكل خطورة على حياتك مالهاش داعي لو بس التزمت بتعليمات الدكتور المعالج.