بتذاكر في رمضان؟ دي طرق هتساعدك تركز في المذاكرة

رمضان فيه حاجات كتير أوي بنحبها من اللمة والسحور والتراويح والمسلسلات وحتى المسحراتي اللي بيجي يقف ينده على الناس في شارعنا.. ولكن لو في حاجة واحدة بس ممكن نكون مابنحبهاش، هو لما يجي وقت الدراسة والامتحانات في رمضان، بنحس إننا مش هنقدر نستمتع بكل الحاجات اللي قولناها من شوية بسبب المذاكرة اللي ورانا، وكمان السؤال الأهم اللي بنحاول نلاقيله إجابة تقريبًا كل سنة.. هنركز إزاي في المذاكرة وإحنا صايمين، وكل القهوة اللي بنعتمد عليها أكتر من الكتب مش هتكون موجودة؟

ولإن معظم طلاب المدارس والجامعات هيكون عندهم midterms الفترة اللي جاية، سواء في شهر رمضان نفسه أو بعده على طول، وطلبة كتير بيحسوا إن ده هيأثر على قدرتهم على المذاكرة خصوصًا إن كتير من الناس بيصدعوا بسبب إنهم مش بيشربوا قهوة، فقررنا نجمعلكم شوية نصائح وطرق بسيطة هتقدر تساعدك إزاي تقدر تركز وتذاكر وقت الصيام في رمضان.

ماتشربش قهوة وشاي كتير بعد الفطار

ممكن تستغربوا من النقطة دي خصوصًا إن إحنا لسه قايلين من ثانيتين إن كتير من الناس مابتعرفش تذاكر في رمضان وهما صايمين لإنهم مابيقدروش يركزوا من غير جرعة الكافيين اللي بياخدوها.. فلو كده من باب أولى إن أول ما يجي وقت الفطار علشان نخزن أكبر قدر ممكن من الطاقة لليوم اللي بعده مش كده؟ الحقيقة إن ده مش صح لإن الصداع اللي بيجيلك بسبب عدم شرب الشاي والقهوة بيبقى حاجة شبه للإدمان ومعظم الوقت الصداع ده بيبقى إحساس وهمي لمجرد إننا خالقين ارتباط شرطي بين عدم شرب المنبهات والصداع. علشان كده لازم تحاول تقلل شربهم على الأقل في رمضان، علشان تقلل من تعودك عليهم وتبدأ واحدة واحدة تتعود على المذاكرة من غيرها.

سماع فيديوهات/ محاضرات وقت الصيام

علشان المسألة تبقى أسهل شوية، لو انت بتذاكر الصبح وانت صايم ممكن تسمع فيديوهات أو محاضرات أونلاين وكأنك بتاخد فكرة سريعة عن الموضوع، من غير ما تعمل مجهود ذهني كبير، وبعد الفطار تكمل على اللي سمعته وتاخد notes.

اختار الأوقات المناسبة للمذاكرة

لو المذاكرة في فترة الصبح فعلًا صعبة بالنسبه لك، ففي حلول تانية ممكن نلجأ لها. يعني مثلًا أوقات زيّ بعد الفطار بساعتين علشان تكون ريحت شوية بعد تقل الأكل وشوفتلك مسلسل ولا حاجة (أي خدمة) ووقت زيّ بعد الفجر لما تكون لسه واكل وشارب وكمان البيت كله نام وانت قاعد في هدوء، أوقات هتساعدك إنك تقدر تركز وتنجز في مذاكرتك.

ركز على نظام غذائي صحي

لإن الصيام بطبيعة الحال ممكن يسبب بعض الإرهاق بسبب نقص في السوائل والغذاء، فلازم تهتم بالأكل اللي انت بتاكله على الفطار، ويكون فيه عناصر غنية بالفيتامينات والمعادن (زيّ اللي موجود في الخضار والفاكهه) لإنهم عوامل أساسية للمساعدة على زيادة التركيز ورفع نشاط الجسم. ومن المهم كمان تناول مشروبات وسوائل كافية زيّ المياة والعصائر الطبيعية علشان تعوض جفاف الجسم طول اليوم اللي بيسبب هبوط عام في مستوى الطاقة. لما تهتم بالتغذية السليمة، هيبقى عندك طاقة أكبر اليوم اللي بعده إنك تكمل.

اعمل جدول مناسب لشخصيتك انت

الحقيقية إن مش كل الناس زيّ بعض، فلو في حد بيحب يذاكر بليل هنلاقي غيره بيحب المذاكرة الصبح وهكذا. علشان كده من الحاجات اللي ممكن تساعد على تنظيم وقت المذاكرة في رمضان هو إن الواحد يكون صريح مع نفسه ويشوف قدرته على المذاكرة بتبقى أحسن في أنهي وقت وبأنهي طريقة.. فتقسيم عدد ساعات اليوم بين النوم والمذاكرة وحتى الاستراحة هيساعدك يكون عندك schedule محدد وcustomized ليك انت بالذات فهتقدر تمشي عليه.

آخر كلمة: بالتوفيق للجميع! ولنصايح أكتر عن رمضان، وماتفوتوش قراءة: “لتعويض قلة الترطيب في رمضان: وصفات طبيعية للعناية بالبشرة“!