واحد من أندر وأقدم الكهوف في الصحراء الغربية في مصر، اتقال عنه “عندما تدخل هذا الكهف يجب أن تدخل منحنيًا”، مجرد ما تشوف الصور هتحس إن دي كادرات سينمائية مرسومة، بس المرة دي مش مرسومة على إيد مخرج، دي مرسومة بإبداع ربنا، الطبيعة المختلفة هناك خلت المصور عمر زكي يقضي أكتر من 3 ساعات علشان يصور ويوزع الإضاءة علشان يرسم المشاهد اللي تليق بجمال المكان ده ويديله حقه في الصور اللي هنشوفها دلوقتي.
الكهف موجود في قلب الصحراء الغربية، بين الواحات البحرية ومحافظة أسيوط في نص صحراء الفرافرة بالقرب من وادي محرق، بعد محمية الصحراء البيضاء بحوالي 7 كيلومتر شرقا باتجاه أسيوط، وبيتكون من مجموعة من المغارات على عمق يزيد عن 50 مترا نزولا في باطن الأرض ورغم كده النزول فيه مش صعب، أكيد لو بتدور على مغامرة، مش هتلاقي فرصة أحسن من زيارة كهف الجارة.
وتكوين الكهف كان على مدار ملايين السنين، ونشأ من المياه النقية ومناخ الصحراء الجاف على مدار السنين دي، وبيختلف الكهف عن باقي الكهوف في المنطقة من حيث تكويناته وشكل رسوبياته المختلفة والفريدة من نوعها.
