مفيش يوم بيعدي علينا من غير تريند جديد، خناقة بقى أو تصريح لحد عن حد، أو حاجة حصلت عملت ضجة كبيرة، وإمبارح ظهر كالعادة تريند جديد على موقع تويتر، بعد تصريحات الإعلامي خالد الغندور في برنامجه “زملكاوي” اللي بيقدمه على قناة الزمالك، وكان بيتكلم فيها عن مباراة الزمالك وأسوان اللي كانت إمبارح وخلصت 0-0، واتكلم عن ظلم التحكيم للزمالك في الماتش، وإنه دا بيفيد الأهلي اللي بينافس هو والزمالك على بطولة الدوري، وده اللي خلى الجمهور على تويتر يطلع هاشتاج على تويتر يهاجم فيه الغندور.
وغضبت الجماهير من طريقة كلام الغندور، وإنه كده عايز خناقة بين جماهير الأهلي والزمالك..
بس في نفس الوقت كان في جمهور دافع عن خالد الغندور، وإنه اتكلم بصراحة، وقال كل اللي هما عايزين يقولوه..
على فكرة خالد الغندور اكثر واحد زملكاوى كان بيدافع عن الزمالك فى كل القنوات اللى اشتغل فيها واضير كثيرا من حبه للزمالك وشوفوا للى حصل مع احمد جمال هو فين دلوقتى حد من الزمالك دافع عنه احنا سيبناة طيب لو ولادة محتاجين الشغل يعمل ايه
— gamal777youns (@gamal777youns) January 24, 2021
إحنا بنتمنى إن التعصب يقل بين الجماهير، وجمهور كل فريق يشجع ناديه من غير ما يغلط في جمهور الفريق التاني، ويبقى عندنا روح رياضية، ونتقبل فكرة إن فريقنا ممكن يخسر مش كل الماتشات هيكسبها.