انتشرت أخبار من كم يوم عن إن السلطات المصرية تحفظت على مصنع جبنة في المنوفية، المصنع ده على حسب كلام التحريات إنهم بيستخدموا فيه دهانات الحوائط والمعجون، وكمان بيضيفوا عليهم مكسبات طعم غير صالحة علشان يصنعوا منها الجبنة! يعني قضية فساد من الدرجة الأولى!
وقت ما داهموا المكان لقوا ملح فاسد وعلب طلاء للحوائط وفرش علشان ينظفوا بيها الجبنة من العفن وبعض ألبان الماعز اللي مرمية في مياه الصرف الصحي! ولما سألوا العمال قالوا إنهم بيستخدموه في صناعة الجبنة وبعد كده بيبيعوها بمبالغ زهيدة!
والواقعة تم تحويلها للتحقيق في النيابة العامة وتم أخذ العينات علشان يتأكدوا من حقيقة مصدرها، وده بعد ما تلقوا بلاغ من نائب رئيس المكتب المركزي لمراقبة الأغذية بمركز تلا بشبين الكوم واللي أفاد فيه إنه تم العثور على كميات وأوزان كبيرة من الجبن المتعفن غير الصالح للاستهلاك بمصنع غير مرخص لإنتاجه، وبتنبعث منهم رائحة مادة طلاء الجدران!
وفي التحقيقات قال المتهم المسئول عن إدارة المصنع إنه بيقوم بخلط مكونات الجبن بمواد كيميائية اللي بتستخدم في الطلاء علشان تزيد سمكها وكثافتها، وتحريات الشرطة أكدت إن العاملين ماكانوش على علم بالجريمة وإن الكمية المظبوطة كانت معدة للبيع والتوزيع على المستهلكين، وعلى أساسه أمرت النيابة بحبس اتنين من المتهمين وهما مالك المصنع ومورد الألبان وأمرت بظبط وإحضار باقي المتهمين.
نتمنى إن كل المخطئين والمذنبين ياخدوا عقابهم لإنهم كانوا بيلعبوا على أرواح الناس وعلى أمراض ماتنتهيش ممكن تصيب اللي أكل منها، ونتمنى إن تجار الفساد واللي بيتاجروا بأرواح الناس إنهم يتجابوا كلهم سواء في المصنع ده أو غيره.