جدل كبير شغال بقاله يومين بعد ما أعلنت أمريكا عن سقوط 3 أجسام غريبة كانت بتحلق فوق سمائها خلال أسبوع، وحصل قلق والدول قررت تغلق مجالها الجوي، وأجهزة الطيران بتتعرض لتشويش لما بتقترب من الأجسام علشان تدمرها، والناس بدأت تتساءل يا ترى دي كائنات فضائية وقررت إنها تغزو الأرض ولا دي نهاية العالم ولا دي أطباق طائرة! وكعادة العرب موضوع زي ده مش هيعدي من تحت إيدهم.
ناس شايفة إن دي رسالة غير مباشرة بيوصلوها لنا الفضائيين بإنهم عايزين يفتحوا حوار معانا، والعرب طبعًا ماكانش عندهم مانع مع الموضوع، وبدؤوا يحطوا لهم خطط علشان يسهلوا طريقة التواصل معاهم.
والسخرية زادت لما انتشر فيديو قديم بيأكد إن بالفعل ظهر كائنات فضائية قبل كده في إيران وأميركا، وأمريكا شرحت أجسامهم في 1947k، وفي ناس اسقبلت الموضوع بالتهاني والمباركات، وبدؤوا ينشروا مقاطع لأفلام عن وصول الكائنات الفضائية للأرض “أهلًا في سلام” “ولا تأذينا ولا نأذيك” .
وناس في عالم تاني من اللي مالقوش حظهم في العلاقات والحب مع الكائنات الأرضية، بقى عندهم أمل إنهم يلاقوا نصهم التاني مع الكائنات الفضائية، وناس تانية من الفئة اللي بتمسك مهنة التحليل على السوشيال ميديا في أي موقف غريب، شايفة إن ده شيء طبيعي بعد اللي شوفناه في آخر تلات سنين، من فيروس قاتل وحرب روسية وأزمة اقتصادية عالمية وزلزال وإن ده هيبقى حفل الختام والتتويج اللي يليق بالبشرية، ورأيهم إننا نقفل نهاية العالم على كده، وناس تانية من عالم آخر شايلة من الكائنات الفضائية لإنهم ماعدوش علينا، وحتى الكائنات الفضائية طلعت عنصرية وبتفرق في المعاملة، وناس تانية من اللي بيدخلوا كلمة “نظرية المؤامرة” في أي جملة مفيدة، قالوا إن الموضوع له أبعاد وخطة ماسونية لازم نبقى مستعدين لها.
قولولنا أنتم كمان إيه رأيكم في اللي بيحصل، ومتوقعين تكون الكائنات دي جاية في سلام ولا ناوية على شر؟