الصرع حالة مرضية مزمنة، يعني بتعيش مع المريض طول حياته، وبتكون الأدوية بغرض تخفيف الأعراض أو تجنبها ولكن مش علاج كامل من المرض، وعلشان كده من الضروري نفهم أساسيات المرض وازاي نتعامل معاه لو كان في حد في المحيط بتاعنا عنده صرع.
الصرع هو نشاط مش طبيعي بيحصل في الدماغ بسبب اضطراب الجهاز العصبي المركزي، وبيظهر المرض في شكل نوبة أو تشنجات متكررة من غير سبب، وعلشان نشخص مريض بالصرع لازم تحصل نوبة مرتين على الأقل.
الصرع ممكن يصيب الرجالة والستات زيّ بعض، بغض النظر عن الاختلافات في العمر أو النوع أو العرق، ولكن بتختلف الأعراض بشكل كبير على حسب نوع الصرع.
أنواع الصرع
بينقسم الصرع عمومًا لنوعين أساسيين، واحد منهم هو صرع النوبات المعممة (Generalized seizures)، وده بيكون فيه نبضات كهربائية مش طبيعية منتشرة في كل أجزاء الدماغ، وممكن تسبب تشنجات عضلية وتصلب في الجسم كله وفقدان الوعي.
أما النوع التاني فهو النوبات الجزئية (Partial seizures)، وده بيحصل بسبب نبضات كهربائية مش طبيعية في أجزاء من الدماغ، ومش بتسبب فقدان الوعي، ولكن ممكن تسبب تشنجات لا إرادية في بعض أجزاء الجسم، أو الدوخة أو التنميل أو رؤية أضواء ساطعة، غير اضطراب في حاسة الشم والسمع والرؤية.
ازاي تسعف المصاب بنوبة صرع؟
بيقول لنا الدكتور محمد حسن، اختصاصي الأمراض العصبية في مستشفى القصر العيني بالقاهرة: “اتجنب إنك تحرك المصاب إلا للضرورة، وابعد عنه أي حاجة حادة أو ممكن تسبب إصابة”.
بيأكد حسن: “حط حاجة ناعمة تحت راس المصاب، وحاول تحركه بهدوء ولطف وتخليه ينام على جنبه، وتجنب إنك تحط أي حاجة في فم المصاب”، إدخال أي حاجة في فم المصاب أثناء النوبة ممكن يسبب كسر في الأسنان أو قطع في اللسة أو حتى كسر في الفك.
بالنسبة للإسعافات الأولية، بيقول لنا الدكتور حسن إن التدخل اللي نقدر نعمله في حالة نوبة صرع قليل، وبيأكد: “ماتحاولش تمنع الحركات العضلية حتى لو كانت عنيفة”.
وكمل كلامه: “لازم تفك أي حزام أو زراير أو أي حاجة بتضغط على رقبة المصاب، علشان ماتسببش اضطراب في التنفس”، وبيأكد علينا نبعد أي حاجة حوالين المصاب ممكن تصطدم به أثناء النوبة.
امتى تكلم الإسعاف؟
بيأكد دكتور حسن إن لو النوبة استمرت أكتر من 5 دقايق لازم نكلم الإسعاف، أما الحالة التانية اللي لازم نطلب فيها مساعدة طبية طارئة هي حدوث إصابة للمريض أثناء النوبة.
بيقول حسن إن لو تكررت النوبة أكتر من مرة في يوم واحد، أو لو تنفس المريض مارجعش للوضع الطبيعي مرة تانية بعد ما النوبة خلصت، ساعتها لازم نكلم الإسعاف علشان المساعدة الطبية تمنع أي تعقيدات طبية خطيرة ممكن تحصل.
علاج حالات الصرع
أخيرًا، بيقول لنا حسن، 80% من حالات الصرع في أغلب المصابين نقدر نسيطر عليها بشكل كامل باستخدام الأدوية، وأحيانًا باستخدام الجراحة.
بعض الأطفال اللي بيصابوا بنوبات صرع بيقدروا يتغلبوا عليها أثناء نموهم وتقدمهم في العمر، بس لازم يلتزموا بالأدوية، وتنتظم مواعيد نومهم.
وأخيرًا بيأكد حسن: “لو كنت مصاب بالصرع ماتبطلش تاخد الأدوية بتاعتك لأي سبب كان إلا بمعرفة الطبيب اللي بيعالجك، ولو وقفت الأدوية ممكن تتعرض للإصابة بنوبات أقسى وأصعب في العلاج”.
أخيرًا، نتمنى لكل المرضى الشفاء العاجل، وبنأكد على الالتزام بالأدوية وعدم التوقف في أي وقت ولأي سبب، ونتمنى من المحيطين بالمصاب يكونوا استفادوا من المقال ده.